Tájikstanda bir táýlikte úsh ret jer silkindi
ASTANA. QazAqparat - Tájikstan aýmaǵynda jergilikti ýaqytpen 01:30-da bir táýliktiń ishinde úshinshi ret jer silkinisi boldy, dep habarlaıdy «Hovar».
Tájikstannyń seısmologııalyq ınstıtýtynyń deregi boıynsha, jer silkinisiniń oshaǵy Dýshanbeniń soltústik-shyǵysynan 263 shaqyrym qashyqtyqta ornalasqan. Jer silkinisi oshaǵyndaǵy silkinis kúshi 5 baldy qurasa, Lahsh aýdanynda - 4 ball, Dýshanbede - 2 balǵa jetken.
Tájikstan Respýblıkasynyń Úkimetine qarasty tótenshe jaǵdaılar jáne azamattyq qorǵanys komıteti habarlaǵandaı, jer silkinisinen úılerdiń qıraǵandyǵy jáne zardap shekkender týraly málimetter tirkelgen joq.
