Tájikstanda barlyq jerde shylym shegýge tyıym salynady

ASTANA. QazAqparat - Tájikstanda qoǵamdyq oryndarda temeki tartýǵa bólinetin arnaıy oryndar jabylady. Temekine bir taldan satýǵa da tyıym salynady, dep habarlaıdy news.tj .

Tájik úkimet «Temeki ónimderin shekteý týraly» zań jobasyn ázirleýde. 2010 jyly shyqqan zańmen salystyrǵanda shylym shegýge qatysty normalar kúsheıtiledi.

Jańa zań boıynsha ákimshilik ǵımarattarynda, memlekettik jáne memlekettik emes jumys kabınetterinde, turǵyn úılerdiń kireberisinde, lıftide, áýejaıda, qoǵamdyq kólikterde temekti tartýǵa tolyq tyıym salynady.

Aıta keterligi, qazir osy maqsattarǵa arnaıy qarastyrylǵan oryndarda shylym shegýge ruqsat berilgen. Sonymen qatar jańa qujat boıynsha eldegi densaýlyq saqtaý, bilim, áleýmettik qorǵaý, mádenıet, sport jáne dinı uıymdarǵa júz metrden jaqyn jerde temeki ónimderin satýǵa tyıym salynady.

Sondaı-aq temeki ónimderin bir taldap satýǵa da bolmaıdy. Tájikstanda temeki ónimderin basqa da taýarlar men qyzmetterge aıyrbastaýǵa, turǵyndarǵa tegin taratýǵa tyıym salynbaq.