Tájikstanda Aıaz Ata ásire dinshilderdiń qurbany boldy
ASTANA. 3 qańtar. QazAqparat - Tájikstanda Aıaz Ata bolyp kıingen er adam ásire dinshilderdiń qurbany boldy, dep habarlady RBK agenttigi.
Jergilikti BAQ-tyń quqyq qorǵaý organdaryna silteme jasap habarlaýynsha, Dýshanbeniń 24 jastaǵy turǵyny Parvız Davlatbekov 2 qańtarǵa qaraǵan túnde kóptegen pyshaq jaraqatynan qaıtys boldy.
P.Davlatbekov dostary men týystaryn quttyqtaý úshin Aıaz Ata bolyp kıinip shyqqan. Alaıda tájik astanasynyń 30-ǵa tarta turǵyny jas jigitti onyń úıiniń qasynda qorshap alyp, «Sen dinsizsiń!» dep pyshaqpen lap qoıǵan.
Jas adamdar dinı tózimsizdikpen kisi óltirgeni anyq, alaıda Tájikstannyń ІІM oqıǵany «kádimgi turmystyq qylmysqa» jatqyzyp otyr.
Buǵan deıin 2011 jylǵy 30 jeltoqsanda Tájikstannyń bas múftıi Saııdmúkarram Abdýkodırzoda musylmandardy «hrıstıandyq» Jańa jyldy merekeleýden bas tartýǵa shaqyrǵan bolatyn. «Musylmandar óz salttaryn saqtaýy tıis. Jańa jyldyq shyrshany bezendirý, bı, oıyndar bizdiń mádenetimizge jat. Grıgorıandyq Jańa jyldy merekeleýdiń bizdiń dinı tamyrlarymyzǵa qatysy joq, ol ıslam sharıǵatyna ǵana emes, tájikterdiń dástúrlerine de janaspaıdy», - dedi ol.
Búgingi kúni Tájikstanda 31 jeltoqsanda Jańa jyldy atap ótýge tyıym salynbaǵan, degenmen kópshiligi 21 naýryzda kún men túnniń teńeletin kúni Naýryz merekesin toılaý qajet degen pikirdi ustanady.
