Tájikstanda 200 adamnan turatyn terrorıster toby áskerılerge shabýyl jasady

DÝShANBE. QazAqparat - Tájikstannyń Taýly Badahshan avtonomııalyq oblysyndaǵy terrorızmge qarsy bólimshe qyzmetkerleriniń kolonnasyna qylmystyq toptyń shabýyl jasaýy saldarynan bir ofıtser qaza tapty, taǵy 13 áskerı qyzmetshi jaralandy, dep habarlaıdy QazAqparattyń menshikti tilshisi Tájikstan ІІM baspasóz qyzmetine silteme jasap.

Іshki ister mınıstrliginiń málimetinshe, 200 adamnan turatyn uıymdasqan qylmystyq top Taýly Badahshan avtonomııalyq oblysyndaǵy Rýshan aýdanynyń ortalyǵynda qarýdyń barlyq túrin qoldanyp, Dýshanbe-Horog tas joly men shekara komendatýrasyna baratyn joldy jaýyp tastaǵan.

«Molotov kokteılderi» sodyrlary Tájikstan Ulttyq qaýipsizdik komıtetiniń lańkestikke qarsy bólimshesiniń kólikter kortejin órtep jiberdi.

Shabýyl saldarynan bir ofıtser qaza taýyp, 13 áskerı qyzmetker aýyr jaraqat aldy.

«Azamattardyń qaýipsizdigi men qoǵamdyq tártipti qamtamasyz etý maqsatynda eldiń quqyq qorǵaý organdary lańkestikke qarsy operatsııany bastady. Nátıjesinde 8 sodyr zalalsyzdandyryldy, 11-i jaralandy jáne lańkestik toptyń 70-ten astam belsendi múshesi ustaldy», - dep habarlady ІІM.

Vedomstvo beıbit turǵyndar arasynda zardap shekkender bolmaǵanyn málim etti.

Qazirgi tańda aýdanda jaǵdaı turaqty, áleýmettik ınfraqurylym men qoǵamdyq kólikter qalypty jumysyna oralǵan.