Tájikstanda 2 kún ishinde 17 sodyrdyń kózi joıyldy
ASTANA. QazAqparat - Tájikstanda arnaıy operatsııa barysynda 2 kún ishinde 17 sodyrdyń kózi joıyldy, dep habarlady www.24.kz.
Taǵy 40-qa jýyq búlikshi qamaýǵa alynǵan. Quqyq qorǵaýshylar sondaı-aq iri kólemdegi qarý-jaraq pen oq-dári tárkilegen.
Eske sala keteıik, 4 qyrkúıekte Tájikstannyń Qorǵanys mınıstrliginiń ortalyq apparaty men Vahdat qalasynyń ishki ister bólimine qarýly shabýyl jasalǵan edi. Munyń bárin qorǵanys mınıstriniń burynǵy orynbasary, general Abdýhalım Nazarzoda uıymdastyrǵany anyqtaldy. Saldarynan resmı málimet boıynsha 8 adam kóz jumǵan. Keıbir aqparat kózderi kúshtik qurylymdardyń 33 ókiliniń qaza bolǵanyn habarlady.
Shabýyldardan keıin general basqarǵan jasaq Ramıt taý shatqalyna jasyrynǵan. Olardy izdestirý operatsııasy jalǵasýda.
