Tájikstan shekarasynda qarýly toptyń 15 múshesiniń kózi joıyldy

NUR-SULTAN. QazAqparat – Tájikstanda qarýly top «Ishkabad» shekara zastavasyna shabýyl jasady, dep habarlaıdy QazAqparat Tájikstannyń «Hovar» aqparattyq agenttigine silteme jasap.

Tájikstannyń Ulttyq qaýipsizdik memlekettik komıteti Shekara áskerleriniń baspasóz ortalyǵynyń málimetinshe, 2019 jyly 6 qarashaǵa qaraǵan túni saǵat 03:23-te belgisiz 20 adamnan turatyn qarýly top «Sultanabad» shekara otrıady áskerı bóliminiń №4 «Ishkabad» shekara zastavasyna shabýyl jasaǵan.

«Qaqtyǵys kezinde olar 5 atys qarýyn qolǵa túsirgen (modernızatsııalanǵan Kalashnıkov myltyǵy). Kúsh qurylymdarynyń jedel áreket etýiniń arqasynda qorshaýǵa alynǵan qarýly qylmystyq toptyń 15 múshesiniń kózi joıyldy, 5-eýi qamaýǵa alyndy. Atys kezinde Shekara áskerleriniń 1 áskerı qyzmetkeri men TR Іshki ister mınıstrliginiń 1 qyzmetkeri qaza tapty», - delingen habarlamada.

Qazirgi ýaqytta oqıǵa ornynda jedel tergeý toby qurylyp, tergeý amaldary júrgizilýde.