Tájikstan Reseıden 2015 jylǵy UQShU tóraǵalyǵynyń estafetasyn qabyldaıdy

MÁSKEÝ. QazAqparat - Búgin Máskeýde ótip jatqan Ujymdyq qaýipsizdik týraly shart uıymy Ujymdyq qaýipsizdik keńesiniń sessııasynda Reseı Uıymǵa tóraǵalyq etý estafetasyn Tájikstanǵa bermek. Bul týraly sóz sóıleý barysynda Reseı Prezıdenti Vladımır Pýtın málimdedi.

«Búgingi sessııada Tájikstan Reseıden UQShU-ǵa tóraǵalyq etý estafetasyn qabyldaıdy. Tájikstandyq áriptesterime jumysta tolaǵaı tabystar tileımin jáne sonymen birge kómek pen qoldaý kórsetýge daıyn ekenimizdi atap ótkim keledi», - dedi ol.

Óz kezeginde Tájikstan prezıdenti Emomalı Rahmon UQShU aıasynda ózara birlesip áreket etý Tájikstan úshin basymdyq mánge ıe ekenin atap ótti.

«Tájikstan Respýblıkasy UQShU-nyń jaýapkershiligi aımaǵynda ony qaýipsizdik pen turaqtylyqty qamtamasyz etýdiń pármendi, ýaqyt synynan ótken aspap retinde qaraı otyryp, onyń aıasyndaǵy ózara is-qımylǵa basa mán beredi. Tájikstannyń kelesi jyly Uıymǵa tóraǵalyq etýi syn-qaterler men qaýipterdi tıimdi sheshýge baǵyttalady», - dedi E.Rahmon.