Tájikstan Prezıdentiniń sapary: Taraptar kópjaqty formatty qoldaıdy
«Ortalyq Azııa memleketteri basshylarynyń kezdesýi óńirlik ózara qarym-qatynastardy nyǵaıtýǵa baǵyttalǵan. Óıtkeni Táýelsizdik jyldarynda bul baılanystar kóbinese ekijaqty deńgeıde nemese úkimetaralyq qatynastar aıasynda iske asyrylǵan bolatyn. Sońǵy jyldarda óńirlik qatynastarda jaqsy qadamdar jasalyp jatyr, ıaǵnı Ózbekstannyń Tájikstanmen, Qyrǵyzstanmen qarym-qatynastary nyǵaıyp keledi. Qaralatyn taqyryptar aıasynda kúrdeli máselelerdi sheshýge ekpin qoıylyp jatyr. Osy oraıda sý problemasy, shekaralyq retteý, saýda-ekonomıkalyq ózara baılanystar qamtylyp, sondaı-aq jalpy ınfraqurylymdy jaqsartýǵa nazar aýdarylyp keledi», - dedi ǵylymı qyzmetker.
Onyń sózine qaraǵanda, Tájikstan Prezıdenti E. Rahmonnyń Astana jasaǵan sapary kópjaqty formatty ańǵartady, sebebi tájik tarapy alda ótetin úlken kezdesýge jáne Qazaqstanmen qatynastardy tereńdetýge múddeli bolyp otyr.
«Kóshi-qon máseleleri men Syrtqy ister mınıstrlikteri deńgeıinde ózara is-qımyl baǵdarlamasy boıynsha mańyzdy qujattarǵa qol qoıylady dep boljanýda», - deıdi Anastasııa Reshetnıak.
Sonymen qatar, sarapshy Qazaqstan Tájikstannyń eń mańyzdy saýda seriktesteriniń biri ekenin atap ótti. Eki el arasyndaǵy taýar aınalymy ósimin eskere otyryp, taraptar bul úrdisti yntalandyrýǵa umtylyp jatyr. Bul turǵyda ótken jyldyń jazynda taýar aınalymyn ózara arttyrý boıynsha jumys tobynyń birinshi otyrysy ótken bolatyn.
«Osy arqyly, Emomalı Rahmonnyń Qazaqstanǵa sapary bir jaǵynan bizdiń elimizge qaraı dostyq qadam bolsa, ekinshi jaǵynan Ortalyq Azııada ózara qarym-qatynastarda kópjaqty formatty qoldaıtyndyǵyn baıqatady. Atap aıtqanda, sońǵy kezderi qarym-qatynastardyń osyndaı túrine kóp úmit artylyp otyr», - dep túıdi Anastasııa Reshetnıak.
Foto: matritca.kz
