Tájikstan prezıdenti sheteldik jýrnalısterge qandaı syılyq jasady

DÝShANBE. QazAqparat - Búgin TMD Memleket basshylary keńesiniń sammıti boıynsha baspasóz máslıxaty ótti. Sol jerde Tájikstan prezıdenti Emomalı Raxmon shetelden kelgen jýrnalısterge arnaıy syılyq daıyndap qoıǵanyn jetkizdi, dep xabarlaıdy QazAqparat tilshisi.

«Búgin men sizder keler aldynda arnaıy tapsyrma berdim. Jýrnalıster, operatorlar - barlyq buqaralyq aqparat quraldarynyń ókilderine prezıdenttiń shaǵyn syılyǵy beriledi. Árbir jýrnalıst alady. Іshinde keptirilgen jemister, «torpedo» deıtin qaýyn jáne granat bar. Bola ma? Bolady dep oılaımyn. Sizderge kóp raqmet!», - dedi E.Raxmon.

Aıta keteıik, búgin Tájikstan astanasy - Dýshanbe qalasynda TMD Memleket basshylary keńesiniń kezekti sammıti ótti. Oǵan QR Prezıdenti Nursultan Nazarbaev ta qatysty. Sammıttiń qorytyndysy boıynsha birqatar qujattarǵa qol qoıyldy. Sonyń ishinde ǵaryshty birlesip ıgerýge qatysty kelisim de bar. 

  

«QazAqparat» agenttigi TMD basty organy - Prezıdentter keńesiniń kezekti otyrysy aldynda buǵan deıingi jıyndarǵa sholý jasap, qabyldanǵan sheshimderdi pysyqtap shyqqan bolatyn. Al Aqordanyń baspasóz qyzmeti tarıhı mańyzy bar fotosýretterdi usyndy.