Tájikstan prezıdenti Qazaqstanǵa memlekettik saparmen keledi

ASTANA. QazAqparat – 2023 jylǵy 25 sáýirde Astanada Qazaqstan men Tájikstan syrtqy ister mınıstrleriniń orynbasarlary deńgeıinde saıası konsýltatsııalar ótedi. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Qazaqstan jaǵynan Syrtqy ister mınıstriniń orynbasary Ermuhambet Qonyspaev, tájik jaǵyn Syrtqy ister mınıstriniń orynbasary Sodık Imomı basqarady. Saıası konsýltatsııalardyń basty taqyryby Tájikstan Respýblıkasynyń Prezıdenti Emomalı Rahmonnyń Qazaqstanǵa aldaǵy memlekettik saparyna daıyndyq máselelerin talqylaý bolmaq», - dedi A. Smadııarov elordada ótken baspasóz máslıhatynda.

Onyń aıtýynsha, konsýltatsııalar barysynda Qazaqstan men Tájikstan arasyndaǵy ekijaqty qatynastardyń qazirgi jaı-kúıi men odan ári damý perspektıvalary da qaralady.

Budan buryn habarlanǵandaı, 2023 jylǵy 26-27 sáýirde Qazaqstan Premer-Mınıstriniń orynbasary – Syrtqy ister mınıstri Murat Nurtileý bastaǵan qazaqstandyq delegatsııa Sıan qalasynda ótetin «Ortalyq Azııa –Qytaı» dıalog formatyndaǵy Syrtqy ister mınıstrleriniń 4-shi keńesine qatysady.

Sondaı-aq 25-26 sáýirde Qazaqstan Syrtqy ister mınıstriniń birinshi orynbasary Qaırat Omarovtyń Nıý-Iorkke sapary ótetini málim etildi.