Tájikstan mekemeleri qazaqstandyq kúzet jabdyqtaryn paıdalanady
Saltanatty rásimge QR SІM Erekshe tapsyrmalar jónindegi elshisi Rápil Joshybaev, Qazaqstannyń Tájikstandaǵy elshisi Asqar Tájibaev, Tájikstan Ádilet mınıstriniń orynbasary Mansýrdjon Ýmarov, BUU-nyń Ortalyq Azııadaǵy esirtki jáne qylmys jónindegi basqarmasynyń óńirlik ókili Ashıta Mıttal, sondaı-aq PAMZ ben BUU-nyń eldik keńseleriniń ókilderi qatysty.
Shara aıasynda Tájikstannyń túzeý mekemelerine arnalǵan kúzet jabdyqtarynyń eki jıyntyǵyn qabyldaý-tapsyrý týraly aktige qol qoıyldy. Bul joba Qazaqstannyń damýǵa resmı kómek (DRK) ulttyq júıesiniń jobasyn iske asyrýdyń arqasynda ǵana múmkin boldy.
QR SІM Erekshe tapsyrmalar jónindegi elshisi R. Joshybaev DRK ulttyq júıesin qurý boıynsha júrgizilip jatqan jumystar, osy saladaǵy ulttyq operatordy, «KazAID» agenttigin qurý jónindegi josparlar týraly aıtyp berdi. Qazaqstandyq elshi, sondaı-aq, Ortalyq Azııa men Aýǵanstandaǵy DRK sheńberindegi birqatar jobalardyń iske asyrylýy týraly habardar etti jáne qazaqstandyq taraptyń osy baǵyt sheńberinde odan ári birlesken jumysqa daıyn ekenin atap ótti.
Tájikstan Ádilet Mınıstriniń orynbasary M.Ýmarov Qazaqstan tarapyna kómek kórsetkeni úshin alǵysyn bildire otyryp, qazaq eliniń osy mańyzdy baǵyttaǵy qyzmeti Tájikstandaǵy jáne jalpy aımaqtaǵy turaqtylyq pen qaýipsizdikti nyǵaıtýǵa múmkindik beretinine senim bildirdi.
Qazaqstannyń DRK salasynda aıtarlyqtaı tájirıbesi bar. Qashan da bizdiń elimiz Aýǵanstanǵa, Qyrǵyzstanǵa, Tájikstanǵa bilim berý granttary men oqý oryndaryn salý túrinde gýmanıtarlyq kómek kórsetti.
Jobany júzege asyrý Ortalyq Azııa óńirindegi qaýipsizdikti qamtamasyz etý jáne Qazaqstan men Tájikstan arasyndaǵy ekijaqty qarym-qatynastardy damytý jónindegi birlesken kúsh-jiger konteksinde mańyzdy.
