Tájikstan Qorǵanys mınıstrliginiń polıgonynda ushaq apatqa ushyrady
DÝShANBE. Hovar-QazAqparat – 4 tamyz kúni Tájikstan Respýblıkasy Qorǵanysqa járdemdesý qoǵamdyq uıymynyń «An-2» oqý-jattyǵý ushaǵy qulady. Saldarynan bir adam ajal qushyp, taǵy bireýi aýrýhanaǵa jetkizildi. Bul týraly Qoǵamdyq uıymnyń baspasóz ortalyǵyna silteme jasap Hovar agenttigi habarlady.
1978 jyly shyǵarylǵan ushaq Tájikstan Qorǵanys mınıstrliginiń «Fahrabad» oqý-jattyǵý polıgonynda josparly ushýlardy oryndaý kezinde tehnıkalyq sebepterge baılanysty apatqa ushyraǵan.
68 jastaǵy ushqysh Horasan aýdandyq aýrýhanasyna jeter-jetpes jolda kóz jumǵan. 28 jastaǵy ekinshi pılot sol aýrýhanada jatyr.
Qazir atalmysh eldiń Memlekettik ulttyq qaýipsizdik komıteti apatqa qatysty qylmystyq is qozǵady. Tergeý amaldary júrip jatyr.
