Tájikstan qazaq bıznesmenderine tabys tabýǵa mol múmkindik beredi - Serik Jumanǵarın

ASTANA. QazAqparat – Tájikstan qazaq bıznesmenderine tabys tabýǵa mol múmkindik beredi. Bul týraly Premer-Mınıstrdiń orynbasary - Saýda jáne ıntegratsııa mınıstri Serik Jumanǵarın aıtty, dep habarlaıdy QazAqparat tilshisi.

Onyń dereginshe, búginde Qazaqstanda Tájikstanmen birlesken 418 kásiporyn jumys istep tur. Onyń 416-sy shaǵyn bıznes sanalady.

«Tájikstan shaǵyn bızneske óte jaqsy múmkindikter usynady. Qazir maýsymaralyq kezeń jáne bizge jemis-kókónis ónimderi jetispeıdi. Al, Tájikstanda ónim jınaý bastaldy. Bıznes osy múmkindikti paıdalana alar edi. Bıznes júrgizý turǵysynda Tájikstanda da, Qazaqstanda da eshqandaı táýekel joq. Zańnama qalyptasqan, ınvestıtsııalyq qorǵaý bar. Elder arasynda tólem de erkin júredi. Sondyqtan da, jumys isteý úshin mol múmkindik bar», - dedi Serik Jumanǵarın bıznes forým aıasynda BAQ ókilderine bergen suhbatynda.

Onyń atap ótýinshe, Tájikstan Qazaqstan ónimderin shyǵarý úshin de úlken naryq sanalady. Bul rette, eń aldymen agrarlyq ónimderdi jetkizýge múmkindik bar. Bıyl bul elge bıdaı, arpa jáne kúnbaǵys maıy kóp jetkizildi. Otandyq óndirýshilerdiń arqasynda tek Tájikstanǵa ǵana kúnbaǵys maıynyń eksporty 20 mlrd teńgege jýyqtady.

«Bar ónimdi ózara jetkizýge múmkindik bar. Al, ol ónimdermen aınalysý úshin shaǵyn kásiporyn bolsa jetkilikti. Kúrdeli lıtsenzııa alýdyń eshqandaı qajettiligi joq. Osy turǵyda Tájikstan, jalpy Ortalyq Azııa elderi Qazaqstannyń shaǵyn jáne orta bıznesmenderi úshin mol múmkindik ashady. Tabys tabý úshin baǵasy da jaqsy», - dedi vıtse-premer.