Tájikstan azamaty 800 keli keptirilmegen marıhýana esirtki zatymen qolǵa tústi
ASTANA. QazAqparat - Kólik polıtseıleri Tájikstan Respýblıkasynyń azamatyn jalpy salmaǵy 800 keli keptirilmegen marıhýana esirtki zattarymen ustady, dep habarlady Kóliktegi ІІD baspasóz qyzmetinen.
«Kóknar-2016» jedel-profılaktıkalyq is-sharasynyń barysynda Kóliktegi ІІD-niń Esirtki bıznesine qarsy kúres basqarmasy men Shý stantsııasy jelilik polıtsııa bólimi qyzmetkerleri birlese otyryp, «Shý-Qumózek» ótkelinde Dýshanbe qalasynyń turǵyny, Tájikstan Respýblıkasynyń 44 jastaǵy azamatyn jabaıy qara sora jınaý ústinde ustady. Kúdikti osyǵan deıin Reseı Federatsııasynyń Qylmystyq kodeksi boıynsha sottalǵan bolyp shyqty.
Saraptama qorytyndysyna sáıkes, tárkilenip alynǵan zat jalpy salmaǵy 800 keli «keptirilmegen marıhýana» esirtki zaty bolyp shyqty.
Ustalǵan azamattyń aıtýynsha, ol esirtki zattaryn ózi úshin jınaǵan.
Atalǵan fakt sotqa deıingi tergeýdiń biryńǵaı tizilimine QR QK-niń 296-babynyń 4-tarmaǵy boıynsha (Asa iri mólsherdegi esirtki, psıhotroptyq zattardy, sol tektesterdi ótkizý maqsatynsyz zańsyz daıyndaý, qaıta óńdeý, ıemdený, saqtaý, tasymaldaý) tirkeldi.
Kúdikti Shý st. JPB ýaqytsha ustaý ızolıatoryna qamaldy.
