Táj-Mahaldyń tórt eselengen úlgisi - Arabııa táji turǵyzylmaq
ASTANA. 10 qazan. QazAqparat - Dýbaılyqtar álem jurtshylyǵyn áli kúnge tańǵaldyrýmen keledi.
Týrısterdi kóptep tartý úshin qolǵa alynǵan túrli sharalar men tyń jobalar el ekonomıkasynyń kúre tamyryna qan júgirtip, serpin berip otyrǵany jasyryn emes. Sondaı jobalardyń biri ári biregeıi bolyp sanalatyn, álemniń jetinshi keremeti atanǵan Úndistandaǵy Táj-Mahaldyń kóshirmesi - Arabııa táji dep atalatyn sáýlet týyndysy 2016 jylǵa qaraı turǵyzylatyn boldy.
Muslim.kz saıtynyń jazýynsha, 350 bólmesi men apartamentten turatyn Arabııa táji, negizinen, bal aıyn baqytty ótkizgisi keletin jas jubaılarǵa arnalǵan.
Mahabbat ańyzyna aınalǵan Táj-Mahaldyń sáýleti men sánin qaıtalaǵan Arabııa táji «túpnusqadan» úsh-tórt ese úlken bolmaq.
Onda tek qonaq úı ornalasyp qana qoımaı, saltanatty sharalar men saýyq keshin ótkizýge arnalǵan zal da, óz saıabaǵy da, 3000 adamǵa shaqtalǵan toıhana, saýda alańdary bolady.
Onyń qurylysyn júrgizetin kompanııa ústimizdegi jyldyń jeltoqsan aıynan bastap, turǵyn úı jáne saýda oryndaryn sata bastaıdy. Arabııa tájinde tek Táj-Mahaldyń ǵana emes, sonymen qatar, Pıramıda, Semıramıda baǵy, Eıfel munarasy jáne Pızan munarasy sekildi álem keremetteriniń kóshirmesi de jasalatyn bolady.
Atalmysh jobanyń jalpy quny 300 mln dollarǵa baǵalanyp otyr.
