TazaQala platformasy arqyly 865 zańsyz qoqys úıindisi anyqtaldy
ASTANA. KAZINFORM – Almaty qalasynda zańsyz qoqys úıindilerimen kúres maqsatynda jasandy ıntellekt elementterine negizdelgen «TazaQala» tsıfrlyq platformasy iske qosyldy.
Joba «Taza Qazaqstan» respýblıkalyq ekologııalyq aktsııasy aıasynda Almaty qalasy prokýratýrasynyń bastamasymen jáne ál-Farabı atyndaǵy Qazaq ulttyq ýnıversıtetimen birlesip ázirlengen.
Platforma turǵyndarǵa qaldyqtardyń zańsyz tógilgen oryndaryn anyqtaýǵa qatysyp, qalanyń ekologııalyq jaǵdaıyn jaqsartýǵa úles qosýǵa múmkindik beredi.
Búginde júıe arqyly 865 zańsyz qoqys úıindisi anyqtalǵan. Onyń 497-si joıylyp, 500 tonnadan astam qaldyq shyǵarylǵan.
«Platforma jasandy ıntellekt tehnologııalaryn paıdalana otyryp, zańsyz qoqys oryndaryn anyqtaý jáne olardy joıý jumystaryn jedel úılestirýge múmkindik beredi. Búgingi kúni júzdegen zańsyz úıindi anyqtalyp, olardyń edáýir bóligi joıyldy. Ekologııalyq talaptardy buzý faktileri boıynsha tıisti sharalar qabyldanýda. Bul bastama qorshaǵan ortanyń jaı-kúıin jaqsartýǵa jáne turǵyndardyń ekologııalyq mádenıetin arttyrýǵa baǵyttalǵan», – dep habarlady prokýratýra.
Vedomstvonyń málimetinshe, qaldyqtardy basqarý kezinde ekologııalyq talaptardy buzǵany úshin Ákimshilik quqyq buzýshylyq týraly kodekstiń 344-babynyń 3 jáne 5-bólikteri boıynsha jergilikti atqarýshy organdardyń birqatar basshylary ákimshilik jaýapkershilikke tartylǵan.
2026 jylǵy 15 maýsymnan bastap prokýratýra ýákiletti memlekettik organdarmen birlesip reıdtik is-sharalardy qolǵa alǵan. Reıd qorytyndysy boıynsha abattandyrý qaǵıdalaryn buzý, qoǵamdyq oryndardy lastaý, jasyl jelekterdi kútip-ustaý talaptaryn saqtamaý jáne ekologııalyq zańnamany buzýdyń ózge de faktileri boıynsha 100-den astam ákimshilik hattama toltyrylǵan.
Zańsyz qoqys úıindilerin anyqtaý jáne joıý jumystary prokýratýranyń turaqty baqylaýynda.
Aıta keteıik, Shymkentte 18 zańsyz qoqys úıindisi joıyldy.
