Tazalyqty ulttyq brendke aınaldyrýymyz kerek — Prezıdent
ASTANA. KAZINFORM — «Taza Qazaqstan» bastamasynyń mán-mazmunyn kúsheıtip, tyń ıdeıalarmen, kreatıvti jobalarmen tolyqtyrý qajet. Bul týraly Memleket basshysy Qasym-Jomart Toqaev Qazaqstan Halyq Keńesiniń birinshi sessııasynda aıtty.
Prezıdenttiń aıtýynsha, «úshinshi sektordyń» basty mindeti — qoǵamda Zań men Tártip, Tazalyq pen Tabıǵatty aıalaý qaǵıdattaryn ornyqtyrý.
— Bul jumystyń mańyzyna bir sózben baǵa berý qıyn. Sizder osynaý memlekettik jáne qoǵamdyq qaǵıdattardyń máni men maqsatyn jaqsy túsinesizder. Ókinishke qaraı, mádenıetsizdik faktilerimen jıi betpe-bet kelemiz. Tabıǵatty, qoǵamdyq oryndardy qasaqana lastaıdy. Qoǵamǵa, memleketke qarsy mundaı beıbastyq áreketterge jazany kúsheıtken durys dep esepteımin, — dedi Memleket basshysy.
«Taza Qazaqstan» — adamnyń aınalasyna jaýapkershilikpen qaraý daǵdysy, azamattyq kemeldiktiń kórsetkishi, memleket órkenıetiniń mańyzdy ólshemi ekeni aıtyldy.
— Qalalarymyz ben aýyldarymyzdyń birazynda joǵary ekologııalyq mádenıet pen qoǵamdyq tártip úlgisin kórip-baıqap júrmiz. Bul bizdi qýantady. Qazaqstandy qonaqjaı ári qaýipsiz el retinde tanıdy. Endi osy artyqshylyqtarymyzben qosa, tazalyqty da ulttyq brendke aınaldyrýymyz kerek, — dedi Qasym-Jomart Toqaev.
Elimizge kelgen qonaqtar qazirdiń ózinde qalalarymyzdyń kelbetine tamsana qaraıdy. Bul Qazaqstannyń týrıstik ári ınvestıtsııalyq tartymdylyǵyn eseleı túsedi.
— Osyndaı jetistikterdi el aýmaǵynda taratýymyz kerek. «Taza Qazaqstan» bastamasynyń mán-mazmunyn kúsheıtip, tyń ıdeıalarmen, kreatıvti jobalarmen tolyqtyrǵan jón, — dedi Prezıdent.
Buǵan deıin Qasym-Jomart Toqaev eldi kórkeıtýge árbir azamat atsalysýy kerektigin aıtqan edi.
Sondaı-aq Prezıdent qoǵamdyq keńester týraly zańnamany jetildirýdi tapsyrdy.
