Tazalyq — tazartylǵan jer emes, qoqys tastalmaǵan jer — Úkimet basshysy

ASTANA. KAZINFORM — Ekologııalyq mádenıet qazirgi Qazaqstan qoǵamynyń kúndelikti ómir saltyna aınalýy qajet. Bul týraly Úkimet basshysy Oljas Bektenov málim etti.

— Memleket basshysynyń bastamasymen qolǵa alynǵan «Taza Qazaqstan» qozǵalysy ekologııalyq mádenıetti arttyrýǵa, sondaı-aq tabıǵatqa, týǵan jerge degen janashyrlyq sezimdi qalyptastyrýǵa baǵyttalyp otyr. Atalǵan bastamany iske asyrý aıasynda elimizdiń aýmaqtary men sý aıdyndaryn tazalaý, aǵash otyrǵyzý boıynsha keń aýqymdy ekologııalyq aktsııalar júıeli túrde ótkizilip keledi. Oǵan jalyndy jastarmen qatar aǵa býyn ókilderi de, bıznes pen qoǵamdyq uıymdar da belsendi qatysyp otyr, — dedi Oljas Bektenov Úkimet otyrysynda.

Premer-mınıstrdiń aıtýynsha, «Taza Qazaqstan» ekologııalyq aktsııasy búginde úlken qozǵalysqa, mádenıetimizdiń ajyramas bóligine aınaldy. 

— Elimizdiń ekologııalyq máselelerin sheshýge jáne tabıǵı baılyǵymyzdy saqtaýǵa turǵyndar da barynsha atsalysyp keledi. Bilim oshaqtarynda «Adal azamat» biryńǵaı baǵdarlamasy aıasynda balalarǵa ekologııalyq tárbıe berý jumystary júrgizilip jatyr. Atalǵan bastamaǵa ata-analar men ustazdar qaýymy da qatysyp jatyr. Mundaı ekologııalyq mádenıet qazirgi Qazaqstan qoǵamynyń kúndelikti ómir saltyna aınalýy qajet. Tazalyq tazartylǵan jerde emes, qoqys tastalmaǵan jerde. Bárimiz osy qarapaıym ǵana qaǵıdany únemi jadymyzda ustaǵanymyz abzal, — deıdi ol.

Buǵan deıin Oljas Bektenov halyqtyń ekologııalyq mádenıetin arttyrý boıynsha naqty usynystar ázirleýdi tapsyrdy. 

Sondaı-aq Premer-mınıstr qoqys tastaıtyn adamdarǵa jazany qatańdatýdy usyndy.