«Taza úı – Taza el» jobasyna ulttyq mártebe berile me
ASTANA. KAZINFORM - Premer-mınıstr Oljas Bektenov Quryltaı depýtattarynyń «Taza úı – Taza el» jobasyna ulttyq mártebe berý usynysyna jaýap berdi.
- Memleket basshysynyń bastamasymen elimizde ekologııalyq mádenıetti qalyptastyrýǵa, qorshaǵan ortaǵa uqypty qaraýǵa, qaldyqtardy bólek jınaý men qaıta óńdeýdi damytýǵa, ekologııalyq máselelerdi sheshýge halyqty, bıznesti jáne memlekettik organdardy tartýǵa baǵyttalǵan «Taza Qazaqstan» jalpyulttyq ekologııalyq bastamasy júzege asyrylyp jatyr, - dedi Úkimet basshysy.
Osy oraıda Oljas Bektenov «Taza úı – Taza el» jobasynyń maqsattary men mindetteri «Taza Qazaqstan» bastamasynyń negizgi baǵyttaryna sáıkes keletindigin atap ótedi.
- Sonymen qatar qorshaǵan ortany qorǵaý jáne tabıǵı resýrstarǵa uqypty qaraý máseleleri Qazaqstan Respýblıkasy Konstıtýtsııasynyń erejelerinde de kórinis tapqan. Osyǵan baılanysty joba is-sharalaryn oǵan jeke ulttyq joba mártebesin bermeı-aq, qoldanystaǵy «Taza Qazaqstan» jalpyulttyq bastamasy aıasynda iske asyrýǵa jáne aýqymyn keńeıtýge bolady, - dedi Oljas Bektenov.
Buǵan deıin Vıtse-Prezıdent Erlan Qarın «Taza Qazaqstan» jalpyulttyq bastamasy jańa ıdeıalarmen jáne tyń jobalarmen tolyqtyrylatynyn jazǵan edi.
