«Taza úı — Taza el»: astanalyqtar qaldyqty ótkizip, tabys taba alady
ASTANA. KAZINFORM — Astana qalasynda «Taza Qazaqstan» ekologııalyq mádenıetti damytý tujyrymdamasy aıasynda «Taza úı — Taza el» ekologııalyq bastamasy iske qosyldy, dep habarlaıdy Ekologııa jáne tabıǵı resýrstar mınıstrliginiń baspasóz qyzmeti.
Jobanyń bastamashysy QR Ekologııa jáne tabıǵı resýrstar mınıstrliginiń, Astana qalasy ákimdiginiń jáne Jalpyulttyq sotsıal-demokratııalyq partııanyń qoldaýymen «Jasyl damý» AQ. Al jobany tájirıbelik turǵyda júzege asyrýdy «Astana Qaqazy» JShS qamtamasyz etti.
Bastama aıasynda elordadaǵy turǵyn úı keshenderiniń aýlalary men aýmaqtarynda qaǵaz jáne plastık qaldyqtaryn bólek jınaýǵa arnalǵan arnaıy konteınerler ornatyldy. Turǵyndar karton, qaǵaz, plastık jáne bótelkelerdi taza kúıinde suryptap tapsyrý múmkindigine ıe boldy. Jınalǵan barlyq qaldyqtar qaıta óńdeý zaýyttaryna jóneltilip, olarǵa «ekinshi ómir» beriledi.
Joba «EcoQolday» baǵdarlamasy aıasynda júzege asyrylyp jatyr. Konteınerlerdi ornatý qaldyqtardy bólek jınaý ınfraqurylymyn qalyptastyrý men qala turǵyndaryn ekologııalyq jaýapty minez-qulyqqa tartýdaǵy mańyzdy praktıkalyq qadam boldy.
— Qaldyqtardy bólek jınaý — bul tek ekologııa men ekonomıka máselesi ǵana emes, sonymen qatar qoǵamnyń ekologııalyq mádenıetiniń kórsetkishi. «Taza úı — Taza el» bastamasy árbir elorda turǵynyna óz úıiniń, qalasynyń jáne tutas eliniń tazalyǵy úshin jeke jaýapkershilikti sezinýge, sondaı-aq osy arqyly tabys taýyp, ony úıdiń qajettilikterine jumsaýǵa múmkindik beredi, — dep atap ótti «Jasyl damý» AQ basqarma tóraǵasynyń orynbasary Nurjan Qabdoldanov.
EcoQolday tsıfrlyq platformasy qaldyqtardy kómý kólemin azaıtýǵa, qaıta óńdeý salasyn damytýǵa jáne resýrstardy tutynýǵa sanaly kózqaras qalyptastyrýǵa yqpal etedi. Turǵyndar úshin bul — qosymsha shyǵyndarsyz jáne qıyndyqsyz ekologııalyq bastamalarǵa qatysýdyń yńǵaıly ári túsinikti quraly.
«Jasyl damý» AQ jáne joba seriktesteri bastamanyń geografııasyn kezeń-kezeńimen keńeıtip, qaldyqtardy bólek jınaý júıesine barǵan saıyn kóbirek turǵyndy tartýdy jáne Qazaqstanda taza, ornyqty ári ekologııalyq jaýapty ortany qalyptastyrý mıssııasyn dáıekti túrde iske asyrýdy josparlap otyr.
Budan buryn Astanada qoqys jaǵatyn zaýyt salynatynyn jazǵan edik.