Taza tabıǵat: Qyzylordada 20 myńnan astam tal egildi
QYZYLORDA. QazAqparat - Qyzylorda oblysynda «Taza tabıǵat» ekologııalyq aktsııasyna 6 myńnan astam turǵyn qatysty.
Kópshilik jergilikti jerde ósetin 20 myńnan astam Syr taly, qara aǵash jáne jemis aǵashtarynyń kóshetterin otyrǵyzdy, dep habarlaıdy QazAqparat tilshisi.
QR Prezıdenti Qasym-Jomart Toqaev byltyrǵy qyrkúıek aıyndaǵy Joldaýynda elimizdi aýqymdy kólemde kógaldandyrýdy jáne ekologııalyq jaǵdaıdy jaqsartýdy tapsyrdy. Memleket basshysynyń tapsyrmasyn oryndaý maqsatynda respýblıka kóleminde búgingi kúni «Taza tabıǵat» ekologııalyq aktsııasy uıymdastyrylýda.
Elimizde jasyl jelekti kóbeıtý maqsatynda ótken jyly Ekologııa, geologııa jáne tabıǵı resýrstar mınıstrligi jergilikti ákimdiktermen birlesip arnaıy algorıtm ázirlegen bolatyn.
Búgin oblys ákimi Gúlshara Ábdiqalyqova Naýryz meıramy qarsańynda Tuńǵysh Prezıdent atyndaǵy saıabaǵynda «Taza tabıǵat» ekologııalyq aktsııasy aıasynda uıymdastyrylǵan aǵash otyrǵyzý rásimine qatysty.
«Babalarymyz Áz-Naýryz kelgende bulaqtyń kózin ashyp, aǵash otyrǵyzýdy dástúrge aınaldyrǵan. Bul - ejelden kele jatqan bizdiń ata-saltymyz ári búgingi kúni jastarǵa kórseter tárbıelik máni zor úlgi-ónegemiz. Týǵan jerdi jáne onyń tabıǵatyn qadirleý - azamattyq paryzymyz desek, Ózimiz turatyn aýlamyzǵa tal egip, týyp-ósken aımaǵymyzdy kógaldandyrý ómir saltyna ári kúndelikti daǵdymyzǵa aınalýy tıis dep bilemin. Syr halqyn osy ıgilikti iske belsene aralasýǵa shaqyramyn», - dedi oblys ákimi Gúlshara Ábdiqalyqova.
Memlekettik qyzmetkerler de aktsııaǵa óz úlesterin qosyp, Tuńǵysh Prezıdent atyndaǵy saıabaqqa 300-ge jýyq aǵash otyrǵyzdy.
Aldaǵy 5 jylda Syr óńiriniń tabıǵatyna tózimdi 178 mıllıon tal, aýyldyq jerlerge 1 mıllıonnan astam aǵash otyrǵyzylady dep josparlanýda.
Budan basqa, Aral teńiziniń qurǵap qalǵan bóligine jyl aıaǵyna deıin 1 mıllıon 800 myńnan asa sekseýil egiledi.
