BQO-da shaǵynaýdan turǵyndary jol joqtyǵyn aıtyp shaǵymdandy
ORAL. KAZINFORM – Batys Qazaqstan oblysy Báıterek aýdany Mıchýrın aýyldyq okrýgi Asan aýylynda «Ońtústik-Shyǵys» shaǵynaýdanynyń turǵyndary qatqyl tabandy jol joqtyǵy jóninde beınejazba jarııalady.
Turǵyndardyń sózine qaraǵanda, jaýyn-shashyndy kúnderi jáne qar erigen kezde jol balshyqqa aınalady. Sonyń saldarynan avtokólikter batyp qalady.
- Shaǵynaýdan turǵyndary avtokólikti shyǵarý úshin arnaıy tehnıkany (ekskavator) jaldap, kún saıyn qosymsha shyǵynǵa qalady. Onyń shaqyrý baǵasy – 20 myń teńge. Ásirese, balalarmen jaǵdaı alańdatady. Durys joldyń joqtyǵynan olar ýaqtyly mektepke bara almaıdy. Bul jerden jedel járdem kóligi de óte almaıdy, - deıdi turǵyndar.
Osy máselege oraı Kazinform tilshisi Mıchýrın aýyldyq okrýginiń ákimi Maksım Mýsalımovqa habarlasqan edi.
Onyń sózine qaraǵanda, atalǵan shaǵynaýdan «Mar-El» sharýa qojalyǵynyń jeke aýmaǵynda ornalasqan.
- Turǵyndar qojalyqtan jer telimderin satyp alǵan. Atalǵan shaǵynaýdanda 80-ge tarta úı, 11 taýnhaýs bar. 250-ge jýyq adam turady. Jol jergilikti atqarýshy organ teńgerimine berilmegen jáne onyń qyzmet etý aıasyna kirmeıdi. Memlekettik aktilerdi tapsyrǵannan keıin ǵana aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi jobalyq-smetalyq qujattama jasaıdy. Sodan keıin qarjynyń múmkindigine qaraı jol qurylysy qarastyrylady, - dedi M.Mýsalımov.
Onyń aıtýynsha, aýyldyq okrýgke kiretin Mıchýrın, Asan, Jerom, Zelenyı, Oktıabr jáne Jambyl eldi mekenderinde barlyǵy 138 kóshe bolsa, sonyń 55-i ǵana asfalttalǵan. Okrýg ortalyǵy Mıchýrın aýylynda 8 kóshege jobalyq-smetalyq qujattama jasalyp, memlekettik saraptamadan ótkizildi. Qazirgi ýaqytta jol salý úshin respýblıkalyq bıýdjet esebinen qarjy kútilip otyr.
- Aýyldyq okrýgte 12 800 adam turady, 3 228 aýla bar. Mıchýrınniń ózinde 9 qabatty úsh úı turǵyzylyp jatyr. Oral qalasynyń bas josparyna túzetýler kúshine ense, Mıchýrın, Asan, Jerom aýyldary oblys ortalyǵynyń quramyna kiredi. Sońǵy úsh jylda aýdan ákimi Marat Toǵjanovtyń qoldaýymen aýyldyq okrýg boıynsha 28 shaqyrymǵa qatqyl tabandy jol tartyldy. Asfalt jol úlesi buryn 18 paıyz bolsa, qazir 42 paıyzǵa jetti, - dep qosty aýyl ákimi.
Eske sala keteıik, budan buryn Batys Qazaqstanda qar sýy aýylǵa kireberis joldy shaıyp ketkenin jazǵan edik.
Sondaı-aq Batys Qazaqstanda aýyl kósheleriniń sýǵa tolǵany ras pa, bul týraly da habarlandy.
