«Taza Óskemen» mekemesiniń eks-basshylary 120 mln teńge jymqyrdy degen kúdikke ilindi

ASTANA. KAZINFORM – Qarjylyq monıtorıng agenttiginiń Shyǵys Qazaqstan oblysy boıynsha departamenti «Taza Óskemen» kommýnaldyq memlekettik kásipornynyń burynǵy basshylyǵyna qatysty bıýdjet qarajatyn jymqyrý deregi boıynsha sotqa deıingi tergep-tekserý júrgizip jatyr.

Kúdiktilerdiń qatarynda kásiporynnyń burynǵy dırektory, onyń orynbasary jáne jeke kásipker bar.

Tergeý málimetinshe, kúdiktiler 2022-2023 jyldary laýazymdyq ókilettikterin paıdalanyp, memlekettik satyp alý rásimderin ótkizbesten, bıýdjet qarajatyn ózderimen baılanysy bar kommertsııalyq qurylymdardyń esepshottaryna júıeli túrde zańsyz aýdaryp otyrǵan.

- Qylmystyq shemanyń máni materıaldardy jetkizý jáne tehnıkany jalǵa alý boıynsha jalǵan qujattar rásimdeýge negizdelgen. Qujattarda jol jóndeýge arnalǵan bıtým men qum satyp alý, sýdy sorýǵa arnalǵan tehnıka jaldaý, sondaı-aq buryn ornatylǵan 23 aıaldama pavılonyn jasaýǵa qajetti materıaldardy alý týraly jalǵan derekter kórsetilgen, - dep jazdy vedomstvodan.

Keıin bul qarajat jeke kásipker arqyly qolma-qol aqshaǵa aınaldyrylyp, shemaǵa qatysýshylar arasynda bólingen.

Keltirilgen zalaldyń jalpy somasy 120 mln teńgeden asty.

Tergeý barysynda kúdiktilerdiń qylmystyq jolmen alynǵan tabysyna satyp alynǵan múlik anyqtaldy: Óskemen qalasyndaǵy elıtalyq turǵyn úı kesheninen páter, BMW X6M jáne Subaru Forester markaly avtokólikter, sondaı-aq jer ýchaskeleri. Bul múlikke sot sanktsııasymen tyıym salyndy.

Kásiporynnyń burynǵy dırektoryna qatysty bultartpaý sharasy retinde eki aı merzimge qamaýǵa alý túrindegi shara qoldanyldy.

Tergeý jalǵasýda.

QR Qylmystyq-protsessýaldyq kodeksiniń 201-babyna sáıkes ózge aqparat jarııa etilýge jatpaıdy.

Aıta keteıik, ShQO turǵyndarynyń kólik pen múlik salyǵyna qaryzy 1 mlrd teńgege jýyqtady.