«Taza kómir» tehnologııasyn engizýge aıryqsha basymdyq beremiz - Toqaev
ASTANA. KAZINFORM – Memleket basshysy elimiz Koreıanyń sýtegi energetıkasyn damytý tájirıbesine qyzyǵýshylyq tanytyp otyrǵanyn atap ótti, dep habarlaıdy Aqorda.
Onyń aıtýynsha, bul baǵytta birqatar birlesken joba pysyqtalyp jatyr. Sonyń biri – Shyǵys Qazaqstan oblysyndaǵy «Jasyl energetıka kesheni».
– Taza sýtegin óndirýge jáne qoldanýǵa qatysty pılotty jobalardy iske asyrý qajet dep sanaımyn. Áıtse de kómir Qazaqstannyń energetıkalyq qaýipsizdiginde mańyzyn joımaıdy. Elimizde 33 mıllıard tonnaǵa jýyq kómir qory bar, al kómirden alynatyn qýat elektr energııasy óndirisiniń 60 paıyzdan astamyn qamtamasyz etedi. Sondyqtan «taza kómir» tehnologııasyn engizýge aıryqsha basymdyq beremiz. Koreıa bıznesin, ásirese, Doosan, KEPCO E&C jáne Midland Power kompanııalaryn kómir generatsııasyn jańǵyrtý jobalaryn birlese júzege asyrýǵa, sondaı-aq aýaǵa taralatyn zııandy zattardy retteý tehnologııalaryn engizýge shaqyramyn, – dedi Qasym-Jomart Toqaev.
Budan bólek, Memleket basshysy tsıfrlandyrý jáne jasandy ıntellekt salasyndaǵy yntymaqtastyqqa erekshe mán berdi.
– Koreıa Respýblıkasy – jahandyq tehnologııa jarysyndaǵy kóshbasshylardyń biri. Qazaqstan da tsıfrlyq transformatsııaǵa belsendi kiristi. Astanada Alem.ai halyqaralyq ortalyǵy ashyldy, sýperkompıýterler iske qosyldy, arnaýly jasandy ıntellekt ýnıversıteti óz jumysyn bastady. Koreıamen birqatar birlesken bastama júzege asyrylyp jatyr. Atap aıtqanda, Túrkistanda Woosong ýnıversıteti ashyldy, Qyzylordada SeoulTech ýnıversıtetimen birge Jasandy ıntellekt ınstıtýty quryldy. Alataý qalasynda ornalasatyn KAIST, ıaǵnı Koreıa ozyq tehnologııalar ınstıtýty fılıaly ózara seriktestigimizdiń serpindi jobasy bolýǵa laıyq. Bul – álemdegi tehnologııa tilin úıretetin jetekshi oqý oryndarynyń biri. Bıyl Koreıa ǵylymı-tehnıkalyq aqparat ınstıtýtymen birlese negizi qalanǵan AI SilkNet predektıvti analıtıka jáne forsaıt ortalyǵy iske qosylady. Meniń oıymsha, eki eldiń ǵylymı mekemeleri, ýnıversıtetteri men tehnologııalyq kompanııalary osy ortalyqtyń aınalysynda bir maqsatqa toptasqany jón. Qazaqstan birlesken jobalardy júzege asyrý úshin Alem.ai halyqaralyq jasandy ıntellekt ortalyǵynyń áleýetin jumyldyrýǵa daıyn. Sonymen qatar Ortalyq Azııa elderine jasandy ıntellekt salasy mamandaryn daıarlaý úshin Koreıamen seriktestik negizinde AI Talent óńirlik baǵdarlamasyn iske qosqan jón dep sanaımyn. Bul óz kezeginde ekonomıkalyq ósim men ǵylymı progreske yqpal etetin jańa tehnologııalyq keńistik qalyptastyrýǵa múmkindik beredi, – dedi Memleket basshysy.
Aıta keteıik, Prezıdent Seýldiń elimizdiń úzdik on saýda seriktesiniń qataryna kiretinin málimdedi.
