«Taza Qazaqstan»: Jolserikter 3,7 myń tonnadan astam qaldyqty qaıta óńdeýge tapsyrdy
ASTANA. KAZINFORM – Ulttyq tasymaldaýshy Prezıdent Qasym-Jomart Toqaevtyń bastamasymen júzege asyrylǵan «Taza Qazaqstan» respýblıkalyq ekologııalyq aktsııasy aıasynda qorshaǵan ortany qorǵaý sharalaryn belsendi túrde jalǵastyryp otyr. Bul týraly «Jolaýshylar tasymaly» AQ baspasóz qyzmeti málimdedi.
«2024 jyldyń alǵashqy jarty jyldyǵynda «Jolaýshylar tasymaly» AQ fılıaldary 3,7 myń tonna qaldyqty jınap, qaıta óńdeýge jiberdi. Olardyń ishinde 2,3 myń tonna qaǵaz, 748 kg plastık, 650 kg shyny, sondaı-aq, 2 myńnan astam sýsyndardyń temir bankileri bar. Qaldyqtar qaıta óńdeý resýrstarymen aınalysatyn kásiporyndarǵa tapsyryldy. Bul qoqys alańyna túsetin qoqys kólemin aıtarlyqtaı azaıtýǵa múmkindik berip, sondaı-aq, ekologııalyq júktemeni tómendetip qana qoımaı, eldegi «jasyl» ekonomıkanyń damýyna yqpal etedi», — delingen habarlamada.
«Jolaýshylar tasymaly» AQ qaldyqtardy jınaý jáne qaıta óńdeý baǵdarlamalaryn jetildirip, kompanııa qyzmetkerleri men jolaýshylardy ekologııalyq jaýapkershilikke úıretip otyr. Jolaýshylar poıyzdardaǵy arnaıy konteınerlerdi paıdalana otyryp, osy bastamalarǵa belsendi qatysa alady.
