«Taza Qazaqstan»: Jetisýda 29 saıabaq jańaryp, 250 myń aǵash otyrǵyzyldy

ASTANA. KAZINFORM – Sońǵy eki jylda Jetisý oblysynda 29 saıabaq, 2 ortalyq alań, kóptegen balalar jáne sport alańdary salynyp, jańǵyrtyldy. Eldi mekenderde 250 myń aǵash otyrǵyzylyp, orman qory 27,4 mln túp aǵashqa ulǵaıdy. Bul týraly óńir ákimi Beıbit Isabaev eseptik kezdesýinde baıandady.

Óńir basshysy «Taza Qazaqstan» respýblıkalyq ekologııalyq baǵdarlamasy júıeli iske asyrylǵanyn atap ótti.

Tipti baǵdarlama aıasynda kóp qabatty turǵyn úılerdiń shatyry men qasbetteri jóndelip, aryq jelileri qalpyna keltirilgen, kóshelerge jaryq shamdary ornatylǵan.

– Halyqtyń qolaıly ári jaıly ómir súrýine nazar aýdaryp, barlyq aýdan-qalalardaǵy ortalyq saıabaqtardy jańǵyrtýdyń jobalyq-smetalyq qujattamalaryn ázirlep jatyrmyz. Osylaısha barlyq saıabaqtar jańa keıipke enedi. Jalpy alǵanda, eldi mekenderde jaıaý júrginshiler aımaqtary men demalys oryndaryn qurý baǵytynda jumys júrgizilip, jańa saıabaqtar men skverler salynyp jatyr, – dedi B.Isabaev Ortalyq kommýnıkatsııalar qyzmetinde ótken baspasóz máslıhatynda.

Oblys qurylǵannan bergi úsh jylda jańa 11 saıabaq, 5 skver, 2 alleıa salynǵan, 21 saıabaq kúrdeli jóndeýden ótken.

– Máselen, Sarqan aýdanynda tabıǵı landshafty saqtalǵan saıabaq jasaldy. Bul rette jasyl jelek aryq pen avtomattandyrylǵan sýarý júıeleri arqyly sýarylady, – deıdi B.Isabaev.

Buǵan deıin oblys ákimi Alakól jáne Balqash jaǵalaýyn kútip ustaıtyn eki kommýnaldyq mekeme qurylǵanyn aıtqan edi.