Taza Qazaqstan: Jetisý oblysynda «Qoıtas» ekoparkiniń qurylysy jalǵasyp jatyr
TALDYQORǴAN. KAZINFORM – Jetisý oblysynda «Qoıtas» ekoparkiniń qurylysy júrip jatyr. Bul biregeı nysandy salý barysynda tabıǵı landshafty tolyq saqtalyp, aýmaǵyna aǵashtar otyrǵyzyldy, «Jońǵar Alataýy» ulttyq tabıǵı parki aýmaǵyndaǵy flora men faýnany beıneleıtin janýarlar músinderi ornatyldy, dep habarlaıdy jergilikti ákimdik.
Eske salsaq, Memleket basshysynyń tapsyrmasyna sáıkes «Taza Qazaqstan» baǵdarlamasy aıasynda Taldyqorǵan jáne Tekeli qalalarynda taǵy eki ekopark salynýda, - dep habarlaıdy Jetisý oblysy ákiminiń baspasóz qyzmeti.
2022 jyly qurylǵan parktiń aýmaǵyn 6 gektardan 15-20 gektarǵa deıin ulǵaıtý josparlanyp otyr. Qazirgi tańda jobalyq-smetalyq qujattama daıyndalýda. Ekopark salý jumystary 2027 jyly tolyq aıaqtalady dep josparlanǵan.
Qazirgi tańda kezeń-kezeńimen abattandyrylyp jatqan jasyl aımaq aýdan turǵyndarynyń súıikti demalys oryndarynyń birine aınaldy.
Parktiń kireberisinde «Densaýlyq» jaǵalaýy salyndy. Ózen boıymen oń jáne sol baǵytta jalpy uzyndyǵy shamamen bir shaqyrym bolatyn jaıaý júrginshiler joly tóselgen. Sondaı-aq saıabaq aýmaǵy tolyq jaryqtandyrylǵan, kelýshilerge qolaıly bolý úshin jaıaý júrginshi joly tóselgen, al serýendeý aımaǵynda oryndyqtar men qoqysqa arnalǵan ýrnalar qoıyldy, beınebaqylaý júıesi ornatylǵan.
Ekopark aýmaǵynda otbasylyq demalys úshin qolaıly jaǵdaı jasalǵan. Munda fýtbol alańy, skeıtbord alańy, vorkaýt aımaǵy, shaǵyn tennıs korty, sol sııaqty eki balalar oıyn alańy bar. Sondaı-aq ashyq aspan astyndaǵy kınoteatr, besedkalar men sýburqaq ornatylǵan, oǵan qosa ulttyq aspaptar, janýarlar jáne ulttyq sport túrlerine baılanysty túrli 15 músin men shaǵyn sáýlettik nysandar qoıylǵan.
Budan bólek, saıabaq pen Jońǵar Alataýy taýlarynyń kórinisi ashylatyn eki sholý alańy jasalǵan, 400 oryndyq amfıteatr, serýendeý alleıasy bar. Sholý alańynyń bireýin taýlar aıasyndaǵy fotoaımaq retinde de qoldanýǵa bolady. Mádenı kópshilik sharalar ótkizýge arnalǵan ashyq aspan astyndaǵy sahna qoıylǵan.
Sonymen qatar ekoparkte qaıyq stansysy, tynysh demalý aımaǵy, ózen jaǵasyndaǵy shahmat oıyn alańy, jalańaıaq serýendeýge arnalǵan soqpaq, ózdiginen demalatyn oryn qarastyrylǵan.
Kógaldandyrýǵa kóp kóńil bólinedi. Parkte kógildir shyrsha, qaraǵaı, týıa sekildi ártúrli 1600-den astam aǵash pen buta otyrǵyzylǵan, tamshylatyp sýarý júıesi bar. Atap ótsek, saıabaqta «Jońǵar Alataýy» ulttyq tabıǵı parki aýmaǵynda ósetin ósimdikter otyrǵyzý, sol jerde mekendeıtin janýarlardyń músinderin ornatý jumystary jalǵasýda. Qazirgi tańda qar barysy men arqardyń músinderi qoıylǵan. Sonymen qatar Sıvers almasynyń kóshetterin otyrǵyzý josparlanyp otyr.
Aldaǵy josparlarda ózen jaǵalaýy boıymen serýen aımaǵyn salý, qaıyqpen serýendeýge múmkindik jasaý, jaıaý kózdelgen.
Sarqan qalasynyń turǵyny Aızada Beketqyzy ekoparktiń týraly óz áserimen bólisti:
– Bala kezimizde osy úlken aq tastardy tamashalaý úshin ózen jaǵasyna serýendeýge keletinbiz. Ata-analarymyz munda qonaqtardy da ertip keletin. Bul tastarǵa qatysty kóptegen ańyzdar men qyzyqty oqıǵalar aıtylatyn. Olardyń tarıhy shamamen bir ǵasyrǵa jýyq deıdi. Qazir bul jerdiń zaman talabyna saı abattandyrylyp, sonymen qatar tabıǵı ereksheligi men landshaftynyń saqtalǵany qýantady. Osylaısha erekshe, biregeı ári ásem ekopark paıda boldy. Búginde bul – qalamyz turǵyndarynyń maqtanyshyna aınalǵan oryn, – dedi ol.
Atap ótsek, «Taza Qazaqstan» baǵdarlamasy aıasynda bıyl Taldyqorǵan jáne Tekeli qalalarynda taǵy eki ekopark ashylady. Oblys ortalyǵynan 3 shaqyrym jerde ornalasqan, aýmaǵy 38 gektardy quraıtyn «Tasbaqa» ekoparki qala turǵyndary men qonaqtarynyń bir kúndik demalysyna, sondaı-aq demalys kúnderin paıdaly ótkizýge qolaıly oryn bolmaq. Al aýmaǵy 21 gektar bolatyn «Serkesaı» ekoparki Tekeli qalasynyń mańynda ornalasqan. Ásem tabıǵatymen tanymal bul oryn belsendi jáne otbasylyq demalysqa óte yńǵaıly.
Jetisý oblysynda júzege asyrylyp jatqan úsh ekopark jobasy tabıǵı landshafty saqtaýǵa, jaıly orta qalyptastyrýǵa, turǵyndar demalysynyń sapasyn arttyrýǵa baǵyttalǵan.
