«Taza Qazaqstan» jańa deńgeıge kóteriledi: Prezıdent ulttyq tazalyq standartyn ázirleýdi usyndy
ASTANA. KAZINFORM – «Taza Qazaqstandy» ult bolmysyna ozyq ózgerister ákelgen biregeı joba dep ataýǵa da bolady. Bul týraly Memleket basshysy Qasym-Jomart Toqaev Prezıdent saıabaǵynda ótken ekologııalyq aktsııada aıtty.
Onyń aıtýynsha, «Taza Qazaqstan» – jalpyulttyq sıpatqa ıe bolǵan bastama, sonymen qatar bul halqymyzdyń sanaly tańdaýy.
– «Taza Qazaqstandy» ult bolmysyna ozyq ózgerister ákelgen biregeı joba dep ataýǵa da bolady. Osyndaı mańyzdy jumystyń arqasynda halqymyzdyń boıynda múldem jańa qasıetter men qundylyqtar paıda bola bastady. Biraq arqany keńge salyp, máz bolyp, bosańsýǵa bolmaıdy. Biz órkenıetti el bolamyz desek, tek alǵa qaraı júrýimiz kerek, – dedi Qasym-Jomart Toqaev Prezıdent saıabaǵynda ótken Taza Qazaqstan» ekologııalyq aktsııasynda.
Sonymen birge, Prezıdent «Taza Qazaqstan» qozǵalysyn jańa sapalyq deńgeıge kóterýdi usyndy.
– Aldymyzda turǵan bıik jáne ózekti maqsattar men mindetter az emes, kóp dep aıtýǵa bolady. Biz «Taza Qazaqstan» qozǵalysyn jańa sapalyq deńgeıge kóterýimiz kerek. Elimizde tazalyqtyń ulttyq standartyn ázirleý qajet dep oılaımyn. Bul – ýaqyt talaby, – dedi Memleket basshysy.
Aıta keteıik, Memleket basshysy Qasym-Jomart Toqaev «Taza Qazaqstan» ekologııalyq aktsııasyna qatysty jáne jas ekobelsendilermen birge Prezıdent saıabaǵy aýmaǵynda aǵash ekti.
Buǵan deıin Q. Toqaev elimizdiń árbir azamaty búgin de, erteń de taza Qazaqstanda jaıly ómir súrýi kerektigin aıtqan edi.
Jyl basynan beri «Taza Qazaqstan» aktsııasyna 7 mln adam qatysyp, 130 myń gektar jer tazartylǵan.
