Taza Qazaqstan: Jambyldyqtar aınalany tazartýǵa asarlatyp kiristi
TARAZ. KAZINFORM — Jambyl oblysynda «Taza Qazaqstan» ekologııalyq aktsııasy keń kólemde ótip jatyr. Aktsııa aıasynda oblystyń barlyq aýdandarynda qoǵamdyq oryndar, kósheler, bazarlar aýmaǵy men sý aıdyndarynyń jaǵalaýy tazartyldy.
Іs-shara maqsaty — halyqtyń ekologııalyq mádenıetiniń deńgeıin arttyrý, órt qaýipsizdigin saqtaý, qoǵamdyq oryndardy, kósheler men sý aıdyndaryn jınalǵan qoqystardan tazartý.
Aktsııa aıasynda birqatar tazalyq sharalary uıymdastyryldy. Sonymen qatar qazaqtyń kóne salty «Asar» dástúri qaıta jańǵyrdy.
Atap aıtqanda, 7 shilde kúni Sarysý aýdany aýmaǵynda qatty jaýyn-shashyn saldarynan kólbeý aǵyn qalyptasyp, birqatar kóshedegi 400-den astam úıdiń aýlasy, 47 úıdiń ishi men 1 mekteptiń jertólesin sý alyp, jergilikti turǵyndardy ábigerge salǵan bolatyn.
Aǵyn sýmen birge qyrdaǵy tal-daraqtar men qoqystar, aýyl kóshelerin basyp qaldy. Osyǵan oraı, «Taza Qazaqstan» aktsııasy aıasynda qazaqtyń ejelgi saltymen «Asar» dástúri qolǵa alyndy.
ıAǵnı, Taraz qalasy, Jambyl, Jýaly, Baızaq jáne Talas aýdandarynyń eriktileri zardap shekken kóshelerdi asarlatyp tazalaý jumystaryn júzege asyrdy. Oǵan 150-ge jýyq azamat qatysty.
«Aǵyn sýdyń saldarynan aýyldaǵy aǵaıynnyń ábigerge túskeni ras. Kóshe toly topyraqpen tal-daraqty tazalaý ońaıǵa soqqan joq. Osy oraıda qazaqtyń kóne dástúri negizinde asarlatyp kelip jatqan ózge aýdandaǵy baýyrlarymyzǵa alǵysymyzdy bildiremiz. Qandaı qıyndyqty bolmasyn aýyz birshilikpen eńsergen elimizdiń bolashaǵy jarqyn bola bersin», — deıdi Sarysý aýdandyq jastar ortalyǵynyń dırektory Asyljan Pazylbekov.
Sonymen birge, bastaýyn Qyrǵyz elinen alatyn Talas ózeniniń jaǵalaýyn qoqystardan tazartý jumystaryna volonterler tartyldy. «Jastar Taza Qazaqstan úshin!» ekologııalyq aktsııasyna 200-den astam jas aǵalaýdaǵy shashylyp jatqan plastık qaldyqtardy jınap, 400 qap qoqysty arnaıy orynǵa aparyp tókti.
Basym kópshiligi jastardy quraǵan aktsııa qorshaǵan ortanyń lastaný problemasyna, ólkemizdiń tabıǵatyn saqtaýdyń jáne ekologııalyq mádenıetti qalyptastyrýdyń mańyzdylyǵyn túsindirýde úlken ról atqarýda.
Sonymen qatar, Taraz qalasynyń «Kóktem» alqabynda, Baızaq, Qordaı, Sarysý aýdandaryndaǵy oblystyq jáne aýdandyq deńgeıdegi joldardyń boıynda, saıabaqtarda ortalyq kóshelerde qýraǵan shópterdi shabý jumystary ótkizildi.
Turǵyndar arasynda tazalyq mádenıetin artyrý maqsatynda belsendi azamattardyń, volonterlardyń qatysýymen Taraz qalasyndaǵy Talas ózeni men Jýaly aýdanyndaǵy Teris ózeni, «Teris-Aşybulaq» sý qoımasynyń Nurlykent, Qyzylaryq aýyldaryndaǵy jaǵalaýy boıyndaǵy qoqystan tazartylyp, belsendi qatysýshylar marapattaldy.
Sonymen birge, Jambyl aýdany, Asa aýylynda volonterler arasynda konkýrstar, Talas aýdanynda «Taza kóshe», «Taza aýla» baıqaýlary ótkizildi. Konkýrstarǵa aýla turǵyndary qatysyp, belgilengen aýlalar synǵa tústi. Jeńimpazdar baǵaly syılyqtarmen marapattaldy.
Baızaq aýdanynyń Qostóbe jáne Sarykemer aýyldyq okrýgteriniń aýmaǵynda belsendi azamattar, eriktiler, depýtattar Taraz-Sarykemer jolynyń boıy, jaıaý júrginshiler joldaryn tazalaý, kógaldardy (gazon) shabý jumystaryn júrgizdi.
Qordaı aýylynyń kire berisinde ornalasqan «Barys-2» bazary negizgi saýda nysany bolǵandyqtan, ári ózge aımaqtardan aýyr júk kólikteri kóptep kelgendikten bazar aýmaǵy qoqysqa tolyp jatady.
Osyny eskerip, turǵyndardy qorshaǵan ortany qorǵaýǵa yntalandyryp, taza ári jaıly orta qurýǵa baǵyttaý maqsatynda jappaı senbilik jumystary uıymdastyryldy.
Eriktiler men jergilikti turǵyndar bazar aýmaǵyn qoqystan tazartyp, jol boıyndaǵy jáne saýda oryndaryndaǵy aımaqtardy retke keltirdi. Sondaı-aq, qatysýshylar bazar mańaıyndaǵy jasyl aımaqtardy sýǵaryp, aǵashtar men gúlderdi retke keltirý jumystaryn atqardy.
Búgingi kúnge Jambyl oblysynda aktsııa aıasynda 320 myń sharshy metr áýejaı, temirjol, avtobeketter men avtobýs parkteriniń irgeles aýmaqtary, 206 myń sharshy metr otyn-energetıka kesheniniń, 108 myń sharshy metr emdeý ortalyǵynyń, 508 myń sharshy metr oqý oryndarynyń, 280 myń sharshy metr orta jáne shaǵyn kásiporyn aýmaǵy tazartyldy.
818 shaqyrym kanaldar men aryq júıeleri, 125 myń turǵyn úı aýlasy men 4,5 myń shaqyrym kóshe tazalanyp, 12 myń tonna qoqys shyǵaryldy.
60 myńǵa jýyq kóshet otyrǵyzyldy, 2,4 myń tal aǵashy sanıtarlyq butalanyp, 455 myń sharshy metr jasyl jelek sýǵaryldy.
Sondaı-aq, 60 tarıhı-mádenı eskertkish pen 143 saıabaq, skver aýmaǵy turaqty qoqystan tazalanyp otyr. Bul jumysqa jalpy 910 tehnıka jumyldyrylǵan.
