Taza Qazaqstan: Jambylda ekologııalyq aktsııa jalǵasýda
TARAZ. KAZINFORM - 700 myńnan astam oblys turǵyndary qatysqan kóktemde bastalǵan ekologııalyq aktsııa kúzdiń alǵashqy aptasynda Jambylda jalǵasty.
«Kúzgi tazalyq» taqyrybynda ótken aktsııa aıasynda Taraz qalasynyń 13 shaǵyn aýdanynda ornalasqan kópsalaly balalar aýrýhanasynyń mańy qoqystardan tazartyldy.
Qoǵamda, jasyratyny joq, tarıhı oryndardyń aýmaǵyn lastaýmen qatar, qundy jádigerlerdi qasaqana qıratý, túrli jazýlar jazý sekildi tártipsizdikterde oryn alýda. Mundaı áreketterden Jambyl aýdany aýmaǵynda ornalasqan Aıshabıbi keseneside tys qalyp otyrǵan joq. Osy oraıda, tarıhı orynda aýyl aqsaqaldary men ardagerleri jáne jastar birlesip kútip baptaý, tazalaý jumystaryn júrgizdi.
Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýynda «Qorshaǵan ortanyń tazalyǵy árkimniń kúndelikti daǵdysyna aınalýy qajet» dep atap ótti.
Memleket basshysynyń bastamasymen qolǵa alynyp otyrǵan ıgi sharaǵa ún qosqan aýyl jastary Baızaq aýdanynyń Sarykemer, Shý aýdanynyń Tóle bı jáne Alǵyn aýyldyq okrýgterinde eńbek ardagerleri, tyl, jalǵyzbasty qarttardyń aýlalarynda sýarý, aryqtaryn tazalaý, ákteý, qorshaýlardy syrlaý jumystaryn jasap, kómek qoldaryn sozdy.
Qordaı aýdanynyń turǵyndary da jeke aýlalaryn tazartý jumystaryna bir mezgilde belsene atsalysty.
Jýaly aýdanynyń jastary «Shaqpaq áýlıe» eskertkishi mańyn, ardagerler men jastar alleıasynda tazalyq jumystaryn júrgizse, Merki aýdanynda «Dostyq» parki, T.Rysqulov aýyldyq okrýinde ortalyq saıabaq qoqystan tazartyldy.
Moıynqum aýdanynda «Tazalyq kireberisten bastalady» ataýymen Shý ózeniniń adamdar aıaldaıtyn oryndarynda tazalyq aktsııasy uıymdastyryldy.
Aktsııa Jańatas qalasynda adamdar kóp júretin temir jol vokzalynda, «Aqubulaq» demalys aımaǵy men kópqabatty turǵyn úılerdiń mańynda júrgizildi.
Jalpy, ekologııalyq aktsııaǵa 500-ge jýyq adam qatysyp, shashylyp jatqan plastık qaldyqtar men qoqystardy jınap, 100-den astam qap qoqysty arnaıy orynǵa aparyp tókti.
