«Taza Qazaqstan»: Jambyl oblysynda 400-ge jýyq quqyqbuzýshylyq anyqtaldy
ASTANA. KAZINFORM — Jambyl oblysynda polıtsııa qyzmetkerleri «Zań men tártip» qaǵıdaty boıynsha «Taza Qazaqstan» aktsııasy aıasynda jyl basynan beri 391 quqyq buzýshylyqtyń jolyn kesti, dep habarlaıdy Polisia.kz.
Qoǵamdyq oryndardyń tazalyǵy men tártibin baqylaýda jedel basqarý ortalyǵynyń beınebaqylaý kameralary da tıimdi paıdalanylyp keledi. Kósheler men aýlalardaǵy jaǵdaı táýlik boıy baqylaýda bolyp, tártip buzǵan azamattar kamera nazaryna iligedi.
Máselen, belgilenbegen jerge qoqys tastaý, qoǵamdyq aýmaqtardy lastaý, abattandyrý talaptaryn buzý, sondaı-aq qoǵamdyq oryndarda temeki tuqylyn laqtyryp, alkogoldik ishimdik ishý sııaqty jaǵdaılar anyqtalyp otyr.
— Kamera arqyly quqyq buzýshylyqty baıqaǵan polıtsııa qyzmetkerleri oqıǵa ornyna jedel baryp, zań buzýshylyqtyń jolyn kesedi. Anyqtalǵan faktiler boıynsha azamattarǵa qoldanystaǵy zańnamaǵa sáıkes sharalar qabyldanady. Tazalyqty saqtaý — tek arnaıy qyzmetterdiń mindeti emes. Qoǵamdyq oryndarǵa uqypty qaraý, qoqysty belgilengen orynǵa tastaý jáne tártip talaptaryn saqtaý — ár azamattyń jaýapkershiligi, — delingen aqparatta.
Aıta keteıik, Aqtóbe oblysynda abattandyrý boıynsha 600-ge quqyqbuzýshylyq anyqtaldy.
