Taza Qazaqstan: Jambyl oblysynda 1 myń gúl otyrǵyzyldy
TARAZ. KAZINFORM — 26 sáýirde Jambyl oblysynda «Taza Qazaqstan» ekologııalyq aktsııasy keń kólemde ótkizildi, dep habarlaıdy Jambyl oblysy ákimdiginiń aqparat jáne qoǵamdyq damý basqarmasy.
Bul kúni oblystaǵy barlyq memlekettik mekemede, onyń ishinde mádenıet, bilim, sport mekemeleri, dinı oryndarda, sonymen birge, kásipkerlik, týrıstik nysandar, iri saýda oryndary, dúkender men meıramhanalardyń aýmaǵynda tazalyq jumystary uıymdastyryldy.
Sondaı-aq, bul kúni Qazaqstan Respýblıkasy Tuńǵysh Prezıdent saıabaǵynda 1000 gúl otyrǵyzylyp, Talas ózeniniń boıy, «Báıterek» shaǵyn aýdanynda ótkizildi.
«Báıterek» shaǵyn aýdanynda ótken aktsııaǵa jastarmen birge polıtsııa qyzmetkerleri de óz úlesterin qosty. Mundaı aktsııa oblystyń barlyq aýdandarynda, aýyldyq okrýgterinde bolyp ótti.
Oblys kóleminde iske asyp jatqan kóktemgi abattandyrý jáne sanıtarlyq tazalyq aılyǵy aıasynda «TazaLike», «Taza aýla», «Taza qala» «Úlgili aýla» konkýrstary ótkizilýde.
Jambyl oblysynda turǵyndardyń tazalyq jóninde jergilikti atqarýshy organdarǵa «Taza Qazaqstan» aktsııasynyń aqparattyq servısi arqyly telegramm-botpen ótinim berýge múmkindigi bar.
Telegramm-bot ashylǵaly beri jalpy 522 ótinim túsken, onyń 91% oryndaldy. Keıbir ótinimder jarnama baǵytynda bolǵandyqtan keıin qaıtarylǵan. Telegramm-botqa túsken ótinimderdiń basym kópshiligi aýmaqtardy kúl-qoqystan tazalaýǵa qatysty bolsa, birneshe ótinim kóshelerge asfalt tóseý, joldardy tazalaýǵa qatysty boldy.
«Taza Qazaqstan» — elimizdegi ekologııalyq jaǵdaıdy jaqsartýǵa baǵyttalǵan ulttyq joba. Onyń negizgi maqsaty — qorshaǵan ortanyń tazalyǵyn saqtaý, halyqty ekologııalyq mádenıetke tárbıeleý.
— Búgin Jambyl oblysynyń barlyq aýdandarynda, oblys ortalyǵynda uıymdastyrylyp otyr. Jyl basynan beri aktsııa aıasynda 350 shaqyrym kanaldar men aryq júıeleri, 50 myń turǵyn úı aýlalary men 2,5 myń shaqyrym kósheler tazalanyp, 5 myńnan tonnadan asa qoqys shyǵaryldy. 130 myńǵa jýyq aǵash otyrǵyzylyp, 2,5 myń aǵash sanıtarlyq butalandy. 60 tarıhı-mádenı eskertkish, 143 saıabaq pen skver aýmaqtary turaqty qoqystardan tazalanýda. Bul jumystarǵa 180 birlik tehnıka jumyldyryldy, — dedi Jambyl oblysy ákimdiginiń energetıka jáne turǵyn-úı kommýnaldyq sharýashylyǵy basqarmasynyń bólim basshysy Smat Satymbekov.
Osyǵan deıin Astanada aýqymdy jalpyqalalyq senbilik bastalǵanyn jazǵan edik.