«Taza Qazaqstan» jalpyulttyq qozǵalysy arqyly tutas ultymyzdyń bolmysyn ózgertip jatyrmyz — Prezıdent
ASTANA. KAZINFORM — «Taza Qazaqstan» tujyrymdamasy men «Zań jáne Tártip» qaǵıdaty egiz uǵym. Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Jalpy, tazalyq pen tártipti saqtaý máselesi árdaıym basty nazarda bolýy kerek. Onsyz eshqandaı damý da, órkendeý de bolmaıtyny aıdan anyq. Biz «Taza Qazaqstan» jalpyulttyq qozǵalysy arqyly tutas ultymyzdyń bolmysyn ózgertip jatyrmyz. Tabıǵatqa nemquraıly qaraýǵa, beıqam bolýǵa, bul máselede eshqandaı qatigezdikke jol berýge bolmaıdy. Adam men tabıǵat — egiz. Biz qorshaǵan ortaǵa qamqor bolýymyz kerek. Taǵy da atap ótkim keledi: qalalardyń sáýleti men kórkinen halqymyzdyń mádenıeti, boıyndaǵy qadir-qasıeti jáne qundylyqtary kórinis tabady, — dedi Prezıdent.
Memleket basshysy elimizdiń taza, tartymdy bolǵany eń aldymen azamattarymyzdyń kóńil-kúıine, áleýmettik jaǵdaıyna áser etetinin basa aıtty.
— Sondaı-aq, bul — ekonomıkalyq ósimge yqpal etetin mańyzdy faktor. Sondyqtan, elimizdi jappaı kógaldandyrý, tazalyqty saqtaý, zań men tártipti buzbaý — memlekettik mańyzy bar mindetter. Biz bir kúnniń qamy úshin emes, bolashaq urpaqtyń jarqyn bolashaǵy úshin osy jumyspen belsendi túrde aınalysýymyz kerek, — Qasym-Jomart Toqaev.
Prezıdent tazalyqqa, tártipke jáne tabıǵatty aıalaýǵa aıryqsha mán beretinin atap ótti.
— Qaıtken kúnde de bul iste kidirýge, bosańsýǵa bolmaıdy. Jekelegen tulǵalar, tipti, tutas halyqtar ózin-ózi tárbıeleı almaǵanyn tarıh dáleldedi. Mundaı mindetti otbasy men mektep, qoǵam men memleket, eń aldymen, mádenı-rýhanı qundylyqtardy dáripteý arqyly oryndaı alady. Biz qalalar men tutas elimizdiń kelbetin ǵana emes, odan da mańyzdysy, ultymyzdyń mentalıtetin ózgertip jatyrmyz. Nemquraılyq pen salǵyrttyqtan, tipti óshpendilikten birtindep arylyp, tazalyqqa, jaýapkershilikke, tabıǵatty aıalaýǵa boı úırete bastadyq. Bul azamattardyń, onyń ishinde birneshe býyn ókilderiniń kóńil-kúıine jaǵymdy áserin tıgizip, qoǵamdaǵy ahýaldyń jaqsarýyna yqpal etedi, túptep kelgende ekonomıkalyq ósimdi jedeldetetin faktorǵa aınalady, — dedi Memleket basshysy.
Qasym-Jomart Toqaev «Taza Qazaqstannyń» qýaty — qoǵamdy jyldar boıy jalǵasatyn jaǵymdy ári jasampaz kún tártibiniń tóńiregine toptastyryp jatqanyn aıtty.
— Mańaıy tap-taza bolyp, jarqyrap tursa, adam da soǵan saı ádep saqtaýǵa tyrysady. Las ári qaraýsyz jerde enjarlyq basyp, quqyqtyq nıgılızm beleń alady. Bul qubylys álemdik ýrbanıstıkada «synǵan tereze saldary» degen ataýmen belgili. Sondyqtan «Taza Qazaqstan» tujyrymdamasy men «Zań jáne Tártip» qaǵıdaty egiz uǵym desek bolady. Berekesizdik pen tártipsizdik beleń alǵan jaǵdaıda zańnyń saqtalýyn talap etý múmkin emes, — dedi Prezıdent.
Aıta keteıik, jıyn barysynda Prezıdent Konstıtýtsııa ár adamnyń qolynda júretin, jumys ústelinde turatyn qujat bolýǵa tıis ekenin aıtty.
