«Taza Qazaqstan»: Ulytaýda «Túlekterdiń aǵash egý» eko-chellendji ótti
JEZQAZǴAN. KAZINFORM — Búgin «Taza Qazaqstan» ekologııalyq aktsııasy aıasynda Ulytaý oblysynda «Túlekterdiń aǵash egý» eko-chellendji ótti.
Atalǵan bastama «Taza Qazaqstan» jalpyulttyq baǵdarlamasy sheńberinde júzege asyrylyp, óńirde ekologııalyq mádenıetti qalyptastyrýǵa baǵyttalǵan mańyzdy jobalardyń biri bolyp tabylady. Aktsııanyń maqsaty – mektep túlekterin qorshaǵan ortany qorǵaýǵa tartý, tabıǵatqa janashyrlyq kózqaras qalyptastyrý jáne ekologııalyq jaýapkershilikti arttyrý.
Іs-sharaǵa Ulytaý oblysy bilim basqarmasyna qarasty Abaı atyndaǵy mamandandyrylǵan mektep-ınternaty men №8 gımnazııanyń túlekteri belsendi qatysty. Jalpy 102 túlek qatysyp, 102 aǵash otyrǵyzdy.
Aktsııa barysynda oqýshylar bilim berý uıymdarynyń aýmaqtarynda, sondaı-aq Jezqazǵan qalasynyń qoǵamdyq keńistikterinde aǵash otyrǵyzyp, óńirdi kógaldandyrýǵa óz úlesterin qosty.
Aıta ketý kerek, respýblıka kóleminde ótip jatqan «Eńbekqorlyq jáne kásibı biliktilik aıy» aıasynda óńirde tárbıelik jáne ekologııalyq baǵyttaǵy birqatar is-sharalar uıymdastyrylýda. Atap aıtqanda, kitap oqýdy nasıhattaý, tarıhı-mádenı murany saqtaý jáne tabıǵatty qorǵaýǵa baǵyttalǵan bastamalar júzege asyrylyp jatyr.
«Túlekterdiń aǵash egý» eko-chellendji – jas urpaqtyń ekologııalyq mádenıetin qalyptastyrýmen qatar, olardyń týǵan jerge degen súıispenshiligin arttyrýǵa yqpal etetin mańyzdy qadam.