«Taza Qazaqstan» ýaqytsha naýqan emes - Prezıdent

ASTANA. KAZINFORM — «Taza Qazaqstannyń» aımaqtarda sapaly júzege asýyna ákimder tikeleı jaýapty. Bul týraly Parlament palatalarynyń birlesken otyrysynda Qazaqstan halqyna Joldaýyn jarııalap jatqan Memleket basshysy Qasym-Jomart Toqaev aıtty. 

«Barshańyzǵa málim, elimizde kóktemnen beri «Taza Qazaqstan» jalpyulttyq ekologııalyq aktsııasy júrip jatyr. Bul – tutas halyqty uıystyrǵan berekeli bastama. «Taza Qazaqstan» sharasyna birneshe aıdyń ishinde 3 mıllıonǵa jýyq azamat atsalysty. Júzdegen myń úıdiń aýlasy tazartyldy, 1 mıllıon tonnadan astam qoqys jınaldy.

Osyndaı ıgi sharalardyń arqasynda qoǵamda jańa mádenıet, jańa qoǵamdyq etıka ornyǵyp keledi. Muny týǵan elge degen súıispenshilik, janashyrlyq deýge bolady. Ulttyń jańa sapasy osyndaı naqty sharalar arqyly qalyptasady. Bul – ýaqytsha naýqan emes. Osy mańyzdy joba jyl boıy jalǵasa berýge tıis. Sebebi, shynyn aıtqanda, keıbir sanasyz azamattarymyz tabıǵatty, kóshelerdi áli de lastap jatyr. Osyndaı adamdardyń áreketine zań boıynsha tosqaýyl qoıý kerek. Bir sózben, qorshaǵan ortanyń tazalyǵy árkimniń kúndelikti daǵdysyna aınalýy qajet», - dedi Qasym-Jomart Toqaev.

Memleket basshysy halqymyzdyń boıynda jaqsy qasıetter óte kóp ekendigine toqtaldy.

«Mysaly, ózge elder bizdi qonaqjaı, aqkóńil halyq retinde biledi. Dál solaı tazalyq jurtymyzdyń qanyna, janyna sińgen qasıet bolýy kerek. «Taza Qazaqstannyń» aımaqtarda sapaly júzege asýyna ákimder tikeleı jaýapty. Olar jurtqa istiń mán-mańyzyn túsindirip, jumysty durys úılestirýge mindetti.

Aımaq basshysy tek sharýashylyqpen ǵana aınalyspaıdy. Ákim qoǵamdyq, rýhanı máselelerdi árdaıym nazarda ustaýǵa tıis. Árbir basshy elmen etene jumys isteýi kerek, turǵyndarmen senimdi baılanys ornatýy qajet. Sonda jurt ta onyń bastamalaryn qoldaıdy, el úshin paıdaly iske jumyla kirisedi. Ákimniń abyroı-bedeli degenimiz de – osy», - dedi Prezıdent.