«Taza Qazaqstan»: Túrkistanda eko-aktsııa aıasynda 2 myńnan asa aǵash egildi
TÚRKІSTAN. KAZINFORM — Túrkistan qalasynda Memleket basshysy Qasym-Jomart Toqaevtyń «Taza Qazaqstan» baǵdarlamasy aıasynda qorshaǵan ortany qorǵaý men ekologııalyq mádenıetti qalyptastyrýǵa baǵyttalǵan aýqymdy is-shara ótti, dep habarlaıdy Túrkistan oblysy ákiminiń baspasóz qyzmeti.
Igi bastamaǵa Túrkistan oblysynyń ákimi Nuralhan Kósherov, oblystyq basqarmalar men departamentter basshylyǵy men ujymy, memlekettik qyzmetshiler, qala turǵyndary, tazalyqqa jaýapty mekeme jumysshylary jáne Túrkistan qalasy ákimdigi men qoǵamdyq uıym ókilderi qatysty.
Óńir basshysy Nuralhan Kósherov tabıǵat janashyrlarymen kezdesip, birge kóshet ekti.
— «Taza Qazaqstan» — bir jyldyq baǵdarlama emes. Ol ómir saltymyzǵa aınalýy tıis. Tek aktsııalarda ǵana emes, kúndelikti ómirde aǵash egip, tazalyqty saqtaı bilsek, ony nasıhattap, jastardy da ıgi iske jumyldyrsaq, bastama óz jemisin beredi. Barsha oblys turǵyndaryn aımaqty kógaldandyrýǵa úles qosýǵa shaqyramyz, — degen Nuralhan Kósherov el aǵalarymen, jastarmen pikir almasty.
Іs-shara aıasynda qalany kógaldandyrý jáne ekologııalyq ahýaldy jaqsartý maqsatynda jappaı aǵash egý jumystary júrgizildi. Nátıjesinde bir kúnde 1200 túp Qyrym qaraǵaıy men 1000 túp japyraqty aǵash egildi. Osylaısha, jalpy sany 2200 aǵash kósheti egilip, Túrkistanǵa kireberistegi jasyl beldeý aıtarlyqtaı tolyqty. Bolashaqta bul aýmaq saıaly baqqa aınalmaq.
Bul bastama Túrkistan qalasynyń ekologııalyq jaǵdaıyn jaqsartýǵa, jasyl jelekter kólemin arttyrýǵa jáne turǵyndardyń tabıǵatqa degen jaýapkershiligin kúsheıtýge baǵyttalǵan. Tańǵy 7:30–dan bastap aǵash ekken kópshilik qaýym kóterińki kóńil-kúımen tarqasty. Kógaldandyrý jumystary aldaǵy ýaqytta da jalǵasyn tabady.
Aıta keteıik, Túrkistan oblysynda 2021-2025 jyldar aralyǵynda 800-den astam eldi mekende 3,6 mılıonnan astam aǵash kóshetin egý kózdelgen. Al bıyl «Taza Qazaqstan» baǵdarlamasy arqyly 1 mıllıon túp aǵash egý jospary bekitilip, naqty jumystar jalǵasyp jatyr.
