«Taza Qazaqstan»: Túrkistan oblysynyń ákimi turǵyndarmen birge saıabaqqa kóshet otyrǵyzdy
TÚRKІSTAN. KAZINFORM - «Taza Qazaqstan» aktsııasynyń «Jasyl aımaq» aptalyǵynyń aıaǵynda Túrkistanda aýqymdy ekologııalyq is-shara ótti. Tarıhı shahar kezekti ret jasyl jelekpen tolyqtyryldy.
Túrkistan oblysynyń ákimi Darhan Satybaldy «Jibek joly» saıabaǵynda kópshilikpen birge kóshet egip, turǵyndardy ekobelsendi bolýǵa shaqyrdy.
– Memleket basshysy Qasym-Jomart Kemeluly «Taza Qazaqstan» aktsııasy naýqandyq emes, turaqty daǵdyǵa aınalatyn bastama ekenin aıtty. Biz óńirimizde kógaldandyrý, abattandyrý jáne tazalyq jumystaryn turaqty túrde jalǵastyramyz. Qorshaǵan ortany taza ustaý, ekologııany jaqsartýǵa úles qosý – bárimizdiń paryzymyz. Búgin otyrǵyzǵan kóshetterimiz jaıqalyp ósip, jazda turǵyndar men qonaqtarǵa saıa bola bersin, – dedi Darhan Satybaldy.
Ekoaktsııaǵa Túrkistan qalasynyń ákimi Nurbol Turashbekov, qalalyq máslıhat depýtattary, medıtsına men bilim mekemeleri, polıtsııa jáne tótenshe jaǵdaı qyzmeti ókilderi, quqyq qorǵaý organdarynyń qyzmetkerleri qatysty. Sonymen birge «Shapaǵat» qoǵamdyq birlestiginiń músheleri, oqýshylar, stýdentter, jergilikti fýtbolshylar, qurylysshylar, tazalyqqa jaýapty mekeme jumysshylary, Halyqqa qyzmet kórsetý ortalyǵy men «Qazaqstan temir joly» mekemesiniń ókilderi de belsene atsalysty. Saıabaq aýmaǵyna 100-den asa aǵash kósheti otyrǵyzyldy.
Túrkistan oblysynda «Taza Qazaqstan» aktsııasy óte joǵary deńgeıde jalǵasyp jatyr. Úsh apta kóleminde myńdaǵan kóshet otyrǵyzylyp, eldi mekender men kósheler tazalandy. «Kıeli meken» aptalyǵynda qasıetti oryndar men eskertkishter mańy tazalanyp, týrıstik nysandardyń ajary ashyla tústi.
