Taza Qazaqstan: tórt kúnde 150 tonnadan astam qoqys jınaldy
ASTANA. KAZINFORM – «Ádilet» partııasynyń jastar qanaty Shyǵys Qazaqstan oblysynda «Taza Qazaqstan» ekologııalyq road-estafetasyn qorytyndylady. 1
3-16 qazan aralyǵynda belsendiler Aqmola, Pavlodar, Abaı jáne Shyǵys Qazaqstan oblystaryn júrip ótip, shamamen 1 800 shaqyrym aýmaqty tazalady. Tórt kúnde 150 tonnadan astam qoqys jınady.
Bul estafeta Memleket basshysy Qasym-Jomart Toqaevtyń bastamasymen júzege asyrylyp jatqan «Taza Qazaqstan» respýblıkalyq ekologııalyq aktsııasy aıasynda uıymdastyryldy. Onyń maqsaty — aýmaqtardy qoqystan tazartýmen qatar, tabıǵatqa jáne qoǵamdyq keńistikterge uqypty qaraý mádenıetin qalyptastyrý.
Shyǵys Qazaqstan oblysynda estafetaǵa qosylǵan Quryltaı depýtaty Erlan Saıyr osyndaı ıgi istiń mańyzdylyǵyna toqtaldy. Onyń aıtýynsha, mundaı aktsııalar qorshaǵan ortaǵa jaýapkershilikpen qaraý jáne tarıhı eskertkishterdi saqtaý mádenıetin qalyptastyrýǵa yqpal etedi.
— Tabıǵatty qorǵaý tek memlekettik organdardyń nemese kommýnaldyq qyzmetterdiń mindeti emes, bul — barshamyzǵa ortaq is. Sondyqtan ekologııalyq mádenıet qalyptastyrý isin jastardan bastap, oǵan qoǵamnyń barlyq múshesin jumyldyrý mańyzdy. «Ádilet» partııasynyń saılaýaldy baǵdarlamasynda da tabıǵatqa janashyrlyqpen qaraý, qorshaǵan ortany qorǵaý jáne eldi mekenderdiń tazalyǵyn saqtaý máseleleri qamtyldy. Mundaı bastamalar osy qaǵıdattardy kúndelikti ómirde júzege asyrýǵa jol ashady, — dedi Erlan Saıyr.
Road-estafeta tek qalalarda ǵana emes, shalǵaı aýyldarda da jastardy biriktirgeni týraly «Ádilet» partııasynyń jastar qanatynyń ókilderi aıtyp berdi.
— Bizdiń maqsatymyz — jol boıyndaǵy qoqysty tazalaý ǵana emes, qoǵamda tabıǵatqa janashyrlyqpen qaraý mádenıetin qalyptastyrý. Osy joly tórt óńirdiń jastary bir maqsatqa jumylyp, shamamen 1 800 shaqyrym jol boıyn tazalady jáne 150 tonnadan astam qoqys jınady. Osyndaı ıgi is ár azamattyń týǵan jerine degen jaýapkershiligin naqty is arqyly kórsetýge múmkindik beredi, — dedi «Jastar Rýhy» jastar qanaty tóraǵasynyń mindetin atqarýshy Erjan Hamıtov.
Aýmaqtardy tazalaýmen qatar, estafeta aıasynda aýyl turǵyndarymen kezdesýler ótkizilip, «Ádilet» partııasynyń ókilderi aldaǵy jumysta eskerý úshin olardyń usynystary men ótinishterin jınady. Sonymen qatar salaýatty ómir saltyn nasıhattaýǵa baǵyttalǵan «Chempıondyq rýh» jobasy aıasynda sporttyq is-sharalar uıymdastyryldy.
Qatysýshylar tarıhı-mádenı eskertkishterdi qorǵaýǵa da erekshe kóńil bóldi. Olar «Vandalızmge jol joq!» aktsııasy aıasynda Abaı oblysyndaǵy Jıdebaı qoryǵynyń aýmaǵy tazalap, Pavlodar oblysyndaǵy Kempirtas jartasyn jáne Shyǵys Qazaqstandaǵy ejelgi Aqbaýyr keshenin saqtaý men qorǵaýǵa shaqyrdy.
Aıta keteıik, ekologııalyq kún tártibi «Ádilet» partııasynyń saılaýaldy baǵdarlamasyndaǵy basym baǵyttardyń biri sanalady. Bul baǵyttaǵy jumys tek tazalyq pen abattandyrý máselelerin ǵana emes, tabıǵı jáne tarıhı nysandardy saqtaýdy, sondaı-aq jastar arasynda ekologııalyq mádenıetti qalyptastyrýdy da qamtıdy.
