«Taza Qazaqstan – Taza Jezqazǵan» baıqaýynyń úzdikteri marapattaldy
ULYTAÝ. KAZINFORM — 8 qyrkúıek – Qala kúni qarsańynda Jezqazǵanda «Taza Qazaqstan – Taza Jezqazǵan» baıqaýynyń jeńimpazdary marapattaldy. Baıqaýda «Kórikti ǵımarat aýlasy», «Úzdik jasyl aýla», «Taza podezd», «Úzdik PIK», «Úzdik MIB» syndy nomınatsııalar boıynsha úzdikter anyqtaldy.
Bas júlde Gagarın kóshesindegi 72/2 úı turǵyny Sharıpa Rymbaevaǵa tabystaldy. Jeńimpazdarǵa marapattardy oblystyq máslıhat depýtattary, partııa fılıaldarynyń basshylary men qoǵamdyq uıym ókilderi tapsyrdy.
Atalǵan baıqaý respýblıkalyq «Taza Qazaqstan» aktsııasy aıasynda uıymdastyryldy. Sol kúni Ulytaý oblysynyń barlyq qalalary men aýdandarynda jappaı senbilikter ótti. Jezqazǵanda jastar men eriktilerdiń qatysýymen ortalyq kósheler tazalanyp, Sátbaevta ekologııalyq mádenıetti nasıhattaýǵa arnalǵan shara uıymdastyryldy. Qarajal qalasy men Jáırem kentinde saıabaqtar men demalys oryndary tazartylsa, Jańaarqa aýdanynda ortalyq alańda senbilik ótkizildi. Ulytaý aýdanynda aýyl turǵyndary men jastardyń qatysýymen Embulaq óńirinde tazalyq sharasy ótti.
Jyl basynan beri oblysta jeti oblystyq jáne segiz qalalyq senbilik uıymdastyryldy. Sondaı-aq apta saıyn «Taza beısenbi» aktsııasy turaqty túrde ótkizilip keledi. Jalpy «Taza Qazaqstan» bastamasyna 44 myńnan astam adam qatysyp, 870 arnaıy tehnıka jumyldyryldy, nátıjesinde 3520 tonna qoqys shyǵaryldy.
