«Taza Qazaqstan – Taza Astana»: Astana kúnine oraı BAQ ókilderi arasynda baıqaý jarııalandy
ASTANA. KAZINFORM – «Astana Tazalyq» JShS BAQ ókilderi men blogerler arasynda baıqaý jarııalaıdy, dep habarlaıdy elorda ákimdiginiń resmı saıty.
«Taza Qazaqstan – Taza Astana» baıqaýy respýblıkalyq «Taza Qazaqstan» ekologııalyq aktsııasy jáne Astana kúni aıasynda ótkiziledi.
Baıqaýdyń negizgi maqsaty – elordadaǵy tazalyq pen tártipti kún saıyn qamtamasyz etip júrgen kommýnaldyq qyzmetkerlerdiń eńbegin keńinen nasıhattaý. Sonymen qatar jumysshy mamandyqtarynyń mańyzdylyǵy men bedelin arttyrý, Astana qalasynyń, onyń shet aımaqtary men qala mańyndaǵy eldi mekenderdiń sanıtarlyq jaǵdaıyn qamtamasyz etý taqyrybyn jan-jaqty ashý kózdeledi. Atap aıtqanda, qaldyqtardy jınaý jáne shyǵarý, kóshelerdi, joldardy, alańdardy, trotýarlar men qoǵamdyq aýmaqtardy qolmen jáne mehanıkalandyrylǵan túrde tazalaý, sý basýdyń aldyn alý sharalaryn kórsetýge basymdyq beriledi.
Baıqaýǵa otandyq buqaralyq aqparat quraldarynyń jýrnalısteri men blogerler qatysa alady.
Baıqaý kelesi nomınatsııalar boıynsha ótkiziledi:
«Úzdik televızııalyq materıal»;
«Baspa basylymyndaǵy úzdik maqala»;
«Internet-basylymdaǵy úzdik jarııalanym»;
«Áleýmettik jelidegi úzdik jarııalanym».
Baıqaýǵa memlekettik nemese orys tilderinde 2026 jylǵy 1 mamyr men 30 maýsym aralyǵynda jarııalanǵan jumystar qabyldanady.
Usynylatyn jumys sanyna shekteý qoıylmaıdy.
Jumystardy táýelsiz komıssııa baǵalaıdy. Komıssııa quramyna kommýnaldyq sala mamandary men tájirıbeli jýrnalıster kiredi. Qazylar alqasy tómendegi krıterıılerge súıene otyryp baǵalaıdy:
- berilgen taqyryptyń ózektiligi jáne sáıkestigi;
- taqyrypty ashý tereńdigi jáne usynylǵan aqparattyń shynaıylyǵy;
- baıandaý stıli;
- avtorlyq paıymnyń biregeıligi.
Baıqaýǵa qatysý úshin materıaldar kelesi elektrondy poshta arqyly qabyldanady: astana_tazalyk@mail.ru. Baılanys nómiri: +7 700 259 2188.
Jumystardy qabyldaý ýaqyty: 2026 jylǵy 30 maýsym, saǵat 18:00-ge deıin (Astana ýaqytymen).
Baıqaý qorytyndysy 2026 jylǵy 2-3 shilde kúnderi jarııalanady.
Jalpy júlde qory – 4 mıllıon teńge.
Eske sala keteıik, buǵan deıin Memleket basshysynyń «Taza Qazaqstan» aktsııasyna belsene qatysqan azamattardy marapattaǵanyn jazǵan edik.
