«Taza Qazaqstan»: stýdentter Baıanaýyl ulttyq parkindegi kólderdi qoqystan tazartty
PAVLODAR. KAZINFORM - Pavlodardaǵy kolledjderdiń stýdentteri Sabyndykól jáne Jasybaı kólderiniń aýmaǵyn turmystyq qaldyqtardan tazartty.
Dúnıejúzilik qorshaǵan ortany qorǵaý jáne Ekolog kúnine oraı Baıanaýylda «Taza Qazaqstan» aktsııasy uıymdastyryldy. Óńirdegi kolledjerdiń stýdentteri ulttyq parktegi ormanshylarmen birge aýmaqty tazartty.
— Tazalyq — barshaǵa ortaq is. Týǵan ólkemizdiń tazalyǵy ózimizge tyǵyz baılanysty. Qorshaǵan ortanyń balansyn saqtaý, tabıǵat anaǵa degen qamqorlyqty qalyptastyrý, tazalyqqa úles qosý-árbir azamattyń mindeti dep bilemin. Baıanaýyl ulttyq parkiniń aýmaǵynda ornalasqan Jasybaı jáne Sabyndykól kólderinde búgin tazartý jumystary júrgizildi. Kolledjderdiń stýdentteri ormanshylarǵa kómekke keldi. Aktsııa barysynda kózge túsken jastardy maqtaý qaǵazdarymen marapattadyq. Barlyq qatysýshyǵa voleıbol doptaryn syıladyq, — deıdi Baıanaýyl ulttyq parkiniń dırektory Ajdar Júsipov.
Eske sala keteıik, Baıanaýylǵa aqqýlar jıi ushyp kelip jatyr.