«Taza Qazaqstan»: SQO-da prokýratýra ekologııalyq zań buzýshylyqtardy anyqtady
PETROPAVL. KAZINFORM - Oblys prokýratýrasy «Taza Qazaqstan» respýblıkalyq ekologııalyq aktsııasyn iske asyrý sheńberinde tabıǵatty qorǵaý zańnamasynyń talaptaryn buzý áreketterin anyqtaý jáne olardyń jolyn kesý boıynsha jumys júrgizip jatyr, dep habarlaıdy oblys prokýratýrasynyń baspasóz qyzmeti.
Máselen, aýmaqtyq sý ınspektsııasy qadaǵalaý organyn úılestire otyryp, jergilikti kásipkermen Esil ózenine quıatyn bulaq aǵyp jatqan saıda qaldyqtardy jınaıtyndyǵyn anyqtady.
Sý jáne ekologııalyq zańnama talaptaryn buzǵany úshin osy sýbekt jalpy somasy 2,6 mıllıon teńge aıyppul túrinde ákimshilik jaýapkershilikke tartyldy.
Quqyq buzýshy zańsyz ornalastyrylǵan qaldyqtardy shyǵarý boıynsha sharalar qabyldady.
Osy aýyldyń aýmaǵynda ekologııalyq talaptardy saqtamaǵany úshin prokýrordyń qaýlysy boıynsha ákimdiktiń laýazymdy tulǵasy ÁQBtK-niń 324-baby boıynsha ákimshilik jaýapkershilikke tartyldy.
Sonymen birge, atalǵan quqyq buzýshylyqtyń jolyn kesý boıynsha ýaqtyly sharalar qabyldamaǵany úshin prokýror polıtsııa organdarynyń laýazymdy tulǵalaryna qatysty tártiptik is júrgizýge bastamashylyq jasady.
Oblys prokýratýrasy qoǵamdyq oryndarǵa, sonyń ishinde saıabaqtarǵa, alańdarǵa, jappaı demalys oryndaryna, sondaı-aq Esil ózeniniń jaǵalaýyna erekshe nazar aýdarady.
Sońǵy eki kúnde ǵana abattandyrý erejelerin buzǵany jáne qoǵamdyq oryndardy lastaǵany úshin 100-den astam adam ákimshilik jaýapkershilikke tartyldy.
Sondaı-aq jergilikti atqarýshy organdardyń nazarynan uzaq ýaqyt boıy tys qalǵan 25 apattyq qoqys tógetin oryndar anyqtaldy.
Prokýrorlyq qadaǵalaý aktileri boıynsha kináli laýazymdy adamdar zańda belgilengen jaýapkershilikke tartyldy, olardy taratý boıynsha sharalar qabyldanady.
Atalǵan baǵytta jumys jalǵasyp jatyr.
-Qurmetti óńir turǵyndary! Sizderdi ekologııalyq zańnamanyń talaptaryn saqtaýǵa, qorshaǵan ortaǵa uqyptylyqpen qaraýǵa jáne «Taza Qazaqstan» ekologııalyq aktsııasy sheńberinde ótkiziletin is-sharalarǵa belsendi qatysýǵa shaqyramyz. Birlesken kúsh-jiger arqyly ǵana biz qolaıly ekologııalyq jaǵdaıdy qamtamasyz etemiz jáne bolashaq urpaq úshin tabıǵı resýrstardy saqtaı alamyz,-delingen habarlamada.
Osyǵan deıin SQO-da 1400-den astam kásipker ekologııalyq tólemdi zańsyz tólegeni týraly jazdyq.
