«Taza Qazaqstan»: ShQO-daǵy Aqbaýyr kesheniniń aýmaǵyn tazartýǵa 250 adam qatysty
ÓSKEMEN. KAZINFORM – Shyǵys Qazaqstan oblysy Ulan aýdanyndaǵy Aqbaýyr kesheniniń aýmaǵyn tazartýǵa 250 adam qatysty.
«Taza Qazaqstan» ekologııalyq aktsııasy aıasynda oblystyń qalalarynda, aýdandary men aýyldarynda aýmaqtardy abattandyrý, kógaldandyrý, tazalaý jumystary júrgizilip jatyr. Sharanyń maqsaty – halyq arasynda qoǵamdyq jáne ekologııalyq mádenıetti qalyptastyrý, otansúıgishtik, týǵan jerge jáne qorshaǵan ortaǵa degen janashyrlyq pen qurmet qundylyqtaryn dáripteý.
Ulan aýdanynda ornalasqan «Aqbaýyr» arheologııalyq keshenine de tazalyq jumystary júrgizildi. Oǵan eriktiler, jýrnalıster, aqyndar jáne aýdan turǵyndary qatysty. Barlyǵy 250-ge jýyq adam aınalany tazalap shyqty.
«Búgin tarıhı mańyzy zor «Aqbaýyr» kesheniniń aýmaǵy tazalandy. Ekologııalyq aktsııa aıasynda keshen aýmaǵyna 50 túp kóshet, Besterek aýylyndaǵy mýzeı aýmaǵyna 30 túp kóshet otyrǵyzyldy. Sondaı-aq qatysýshylarǵa arnap Ulan aýdanynyń mádenıet qyzmetkerleriniń daıyndaǵan merekelik kontserti qoıylyp, as berildi, – deıdi Ulan aýdany ishki saıasat bóliminiń basshysy Qanat Oralbekov.
Ekologııalyq aktsııa bes aptaǵa josparlanǵan. Osy aptada «Kıeli meken» degen ataýmen kıeli jerlerge, tarıhı-mádenı eskertkishterdiń aýmaǵyna tazalyq jumystary júrgizilip jatyr.
«Jer anany taza ustaý erteńgi urpaǵymyz úshin kerek. Ásirese kıeli jerler men ejelgi eskertkishterdiń aýmaǵyn taza ustaýdyń mańyzy zor. Óıtkeni olar ishki týrızmdi damytýdyń tetigi ǵoı. Shetelden jáne elimizden qanshama týrıster kıeli jerlerdi tamashalaıtyny belgili. Sondyqtan da oblysymyzdaǵy tilshiler qaýymyn bastap kelip elimizge belgili «Aqbaýyr» kesheniniń aýmaǵyn tazalaýǵa qatystyq. Ekologııalyq aktsııanyń bir aptasy «Kıeli meken» degen ataýmen ótip, eskertkishterdiń aýmaǵyn tazalaǵanmyz óte durys boldy, – deıdi jýrnalıst, QR Jýrnalıster odaǵy ShQO fılılalynyń tóraǵasy Mereı Qaınaruly.
Aıta keteıik, aımaqqa kelgen týrıster árdaıym atbasyn buratyn «Aqbaýyr» arheologııalyq kesheni Ulan aýdany Besterek aýylynyń soltústiginen 3 shaqyrym jerde Aqbaýyr taýynyń eteginde ornalasqan.
