«Taza Qazaqstan»: ShQO-da bıyl 4,4 myńnan astam quqyqbuzýshylyq anyqtaldy
ÓSKEMEN. KAZINFORM — Shyǵys Qazaqstan oblysynda «Taza Qazaqstan» aktsııasy aıasynda jyl basynan beri 4,4 myńnan astam quqyqbuzýshylyq tirkeldi.
Óńir polıtseıleri oblystyń tazalyǵy men tártibin saqtaýǵa, qorshaǵan ortany lastaý jáne abattandyrý erejelerin buzýdyń aldyn alýǵa baǵyttalǵan respýblıkalyq «Taza Qazaqstan» aktsııasy aıasynda reıdter júrgizip jatyr.
— Osy jyldyń basynan beri polıtsııa qyzmetkerleri 4 483 ákimshilik quqyq buzýshylyqty anyqtady. Onyń ishinde 3 671-i abattandyrý qaǵıdalaryn buzýǵa, al 812-si qoǵamdyq oryndardy lastaýǵa qatysty. Barlyq kináli azamattar Qazaqstan Respýblıkasynyń zańnamasyna sáıkes jaýapqa tartyldy, — dep habarlady ShQO polıtsııa departamentinen.
Ruqsat etilmegen qoqys úıindilerin anyqtaý men joıý maqsatynda da tıisti sharalar atqarylýda. Bıyl Shyǵys Qazaqstan aýmaǵynda ruqsat etilmegen 98 qoqys úıindisi anyqtalyp, onyń 76-sy joıyldy.
— Beınebaqylaý kameralary quqyqbuzýshylyqtardy anyqtaýda tıimdi qural bolyp otyr. Kóshedegi kameralardyń kómegimen aýmaqtardy lastaý jáne abattandyrý qaǵıdalaryn buzý faktileri der kezinde anyqtalyp, tıisti sharalar qoldanylyp jatyr. Bul óz kezeginde azamattardyń qorshaǵan ortanyń tazalyǵyna degen jaýapkershiligin arttyrady, — delingen aqparatta.
Eske salsaq, osyǵan deıin myńdaǵan aqmolalyq «Taza Qazaqstan» ekologııalyq marafonyna qatysqany habarlanǵan.
