«Taza Qazaqstan»: ShQO-da 22 myńnan astam zańbuzýshylyq tirkeldi

Óńirde «Taza Qazaqstan» aktsııasy aıasynda ekologııalyq talaptardy buzǵandardy jaýapqa tartý úshin reıdter júrip jatyr.

- Qazirgi ýaqytta kósheler men aýlalardyń tazalyǵyn qoqys alańdary men qaýipti aımaqtarǵa baǵyttalǵan 135 beınebaqylaý kamerasy qadaǵalap tur. Olardyń kómegimen jyl basynan beri 1000-nan astam zańbuzýshylyq tirkeldi, - dep habarlady ShQO polıtsııa departamentinen.

Óńirde tártipti saqtaý úshin kúndelikti rejımde 16 mobıldi top jumys istep jatyr. Búgingi tańda 8 000-nan astam reıd ótkizilgen. Sonyń nátıjesinde, abattandyrý salasyna qatysty 22 000-nan astam ákimshilik quqyqbuzýshylyq anyqtaldy.

- Jergilikti atqarýshy organdarmen birlesip, anyqtalǵan 344 stıhııalyq qoqys úıindisiniń 308-i joıyldy. 2026 jyldyń basynan beri oblys polıtseıleri qoǵamdyq oryndardy lastaýdyń 2 530 faktisiniń jolyn kesti, - delingen aqparatta.

Eske salsaq, osyǵan deıin «Taza Qazaqstan» aktsııasy aıasynda Abaı oblysynda 4105 quqyqbuzýshylyqtyń joly kesilgeni habarlanǵan.