«Taza Qazaqstan» Semeıde: stýdentter orman men tabıǵatty qorǵaýdyń syryn úırendi
SEMEI. KAZINFORM — Semeı qalasynda «Taza Qazaqstan» baǵdarlamasy sheńberinde ekologııalyq baǵyttaǵy mazmundy dáris ótip, stýdentterge tabıǵatty qorǵaý mádenıetin qalyptastyrýǵa arnalǵan keń kólemdi aqparat usynyldy, dep habarlaıdy Abaı oblysynyń ákimdigi.
Sharaǵa «Semeı ormany» tabıǵı rezervatynyń mamandary qatysyp, orman alqaptaryn saqtaý, tabıǵatty qalpyna keltirý jáne ekologııalyq qaýipterdiń aldyn alý jóninde jan-jaqty túsindirme berdi.
Dáriske 150-den astam stýdent qatysyp, tabıǵatty qorǵaý salasynyń mamandarymen erkin formatta pikir almasýǵa múmkindik aldy.
Dáris barysynda qorshaǵan ortany qorǵaýdyń zamanaýı tásilderi, orman ekojúıesin qalpyna keltirýdiń erekshelikteri, sondaı-aq tabıǵatqa jaýapkershilikpen qaraýdyń mańyzy talqylandy. Mamandar stýdentterdiń suraqtaryna jaýap berip, orman sharýashylyǵyndaǵy kásibı qyzmettiń qyr-syryn ashyp kórsetti.
«Semeı ormany» tabıǵı rezervatynyń orman ósirý ınjeneri Aıdana Sabyrjan óńirdegi ekologııalyq bastamalar týraly óz pikirin bildirip, jastardyń ekologııalyq mádenıetin nyǵaıtý «Taza Qazaqstan» baǵdarlamasynyń basty baǵyttarynyń biri ekenin atap ótti.
— «Semeı ormany» rezervatynda «Taza Qazaqstan» aktsııasy óte úlken aýmaqta jáne keshendi túrde júrgiziledi. Búgin atap ótilgendeı, biz tıisti mekemelermen birlese otyryp, aǵash otyrǵyzý, qustarǵa uıalar jasaý, aýmaqtardy qoqystan tazartý sııaqty aýqymdy ekologııalyq jumystardy birge atqaryp kelemiz. 2025 jyly «Semeı ormany» aýmaǵynda aǵash otyrǵyzý jumystary aýqymdy kólemde júrgizildi. Kóktem mezgilinde ashyq tamyrly qaraǵaı kóshetteri otyrǵyzylyp, jalpy 4810 gektar alqap qamtyldy. Kúzgi maýsymda 475 gektar aýmaqqa jabyq tamyrly kóshetter egildi. Jalpy eseppen alǵanda, bir jyl ishinde 2 mıllıonnan astam aǵash otyrǵyzyldy. «Semeı ormany» rezervatynyń basty mindetteriniń biri — Memleket basshysynyń Abaı oblysynda 2021–2027 jyldar aralyǵynda 2 mlrd aǵash otyrǵyzý jónindegi tapsyrmasyn júıeli túrde oryndaý. Osy baǵytta úzdiksiz jumys atqarylyp keledi. Qazirgi ýaqytta rezervat aýmaǵynda 21 myń gektardan astam jerge 100 mıllıonnan artyq aǵash otyrǵyzyldy. Sondyqtan, «Taza Qazaqstan» tek bir rettik aktsııa emes, bul — ár azamattyń tabıǵatqa degen jaýapkershiligin kúsheıtýge baǵyttalǵan uzaq merzimdi mádenı qalyp. Orman — bizdiń ortaq baılyǵymyz, sondyqtan ony qorǵaý ár býynnyń mindeti, — dedi ol.
Stýdentter úshin mamandardan tikeleı aqparat alý úlken tájirıbe boldy. Olar orman sharýashylyǵynda qyzmet etýdiń erekshelikteri, ekologııalyq qaýipterdiń aldyn alý sharalary jáne tabıǵatty qalpyna keltirý jumystary jaıly suraqtar qoıyp, naqty jaýap aldy.
«Orman sheberi» mamandyǵynda bilim alyp jatqan stýdent Aqerke Talǵat dáristiń stýdentter úshin asa mańyzdy bolǵanyn aıtty.
— Ekologııany tek kitaptan oqý basqa, al ony kúndelikti qorǵap júrgen mamandardan tyńdaý múldem bólek deńgeı. Osyndaı is-sharalardy jıi ótkizip turǵan jón, sebebi bul ormannyń densaýlyǵy men sanıtarlyq jaǵdaıyn jaqsartýǵa yqpal etedi. Búgin orman otyrǵyzý kórsetkishteriniń ósip jatqanyn bildim. Bolashaqta osy salada ózimdi synap kórgim keledi. Ekologııaǵa óz úlesimdi qosa alamyn dep senemin, — dedi Aqerke Talǵat.
Kolledj ben «Semeı ormany» rezervati arasyndaǵy seriktestik aıasynda aldaǵy ýaqytta da ekologııalyq baǵyttaǵy lektsııalar, praktıkalyq kezdesýler jáne stýdentterdiń tabıǵat qorǵaý is-sharalaryna qatysý múmkindikteri qarastyrylmaq.
Shara uıymdastyrýshylarynyń aıtýynsha, mundaı kezdesýler jastardyń tabıǵatqa degen sanaly kózqarasyn qalyptastyrýǵa jáne «Taza Qazaqstan» baǵdarlamasynyń óńirde tıimdi júzege asýyna óz úlesin qosady.