«Taza Qazaqstan»: Prezıdent Teleradıokesheni ujymy Astanada senbilikke qatysty
ASTANA.KAZINFORM – Prezıdent Teleradıokesheni ujymy «Taza Qazaqstan» respýblıkalyq ekologııalyq aktsııasy aıasynda ótken jalpy qalalyq senbilikke belsene qatysty.
TRK qyzmetkerleri Astana qalasy ákimdigi sanıtarlyq tazartý aımaqtarynyń biri retinde aıqyndaǵan Nura–Esil kanaly boıyndaǵy bekitilgen aýmaqty tazalaý jumystaryna shyqty.
Jýrnalıster búkilhalyqtyq taza ári jasyl el qalyptastyrý bastamasyn qoldap, jaǵalaý aımaǵyn qoqystan tazartyp, qoǵamdyq keńistikti retke keltirdi. Bul elordany abattandyrý isine qosylǵan úles boldy.
Ekologııalyq is-sharaǵa qala turǵyndary, memlekettik organdardyń ókilderi, eńbek ujymdary, bıznes qurylymdary, eriktiler, máslıhat depýtattary, qoǵamdyq uıymdar, sondaı-aq mádenıet pen sport qaıratkerleri qatysty.
Elordanyń ártúrli aýdandarynda keshendi tazalyq jumystary júrgizilip, kósheler, jaıaý júrginshiler joldary men aýlalar tazartylyp, turǵyn alaptar retke keltirildi, zańsyz qoqys úıindileri joıyldy. Sonymen qatar jasyl jelekterdi kútip-baptaý jáne qalany kógaldandyrý boıynsha maýsymdyq jumystar atqaryldy.
Keń aýqymdy ekologııalyq aktsııaǵa 120 myńnan astam qala turǵyny qatysty. 10 myń aǵash otyrǵyzylyp, 150 tonnadan astam qoqys jınalyp, shyǵaryldy.
Búgingi senbilik taza aýla, taza aýdan jáne taza qala ıdeıasynyń kúndelikti ómir saltyna aınalyp kele jatqanyn jáne azamattardyń jeke tańdaýyna aınalǵanyn taǵy bir márte kórsetti.
Aıta keteıik, Memleket basshysy «Taza Qazaqstan» respýblıkalyq ekologııalyq aktsııasyna qatysty. Aktsııa barysynda Prezıdent Qasym-Jomart Toqaev sóz sóılep, eki jyl buryn taǵylymy mol, mán-mazmuny aıryqsha «Taza Qazaqstan» jalpyulttyq aktsııasy bastalǵanyn aıtty.
