Taza Qazaqstan: Pavlodarda 26 myńnan astam aǵash egildi
ASTANA. KAZINFORM - «Taza Qazaqstan» aktsııasyna Ertis-Baıan óńiriniń halqy belsene qatysty. Ár aptada ótkizilgen tazalyq, ekologııalyq is-sharalar aıasynda eldi mekender abattandyryldy. Aktsııa barysynda oblystyń eldi mekenderinde jalpy sany 26,7 myń kóshet egilgen.
El úlkenderi men jastar eldi mekenderdi kógaldandyrýǵa barlyq jerlesterin shaqyra otyryp, aldaǵy ýaqytta aǵash egý ıgi dástúrge aınalsa degen nıetterin jetkizdi. Uıymdastyrýshylardyń sózinshe, óńirdegi ekojúıeni jaqsarta túsý osyndaı shaǵyn qadamdardan bastalady.
Alǵashqy aptada «Berekeli ólke» ataýymen kommýnaldyq qyzmetter men uıymdar eldi mekenderdiń aýmaǵyn tazalady. 510 shaqyrym kósheler men trotýarlar retke keltirildi, 3200-den astam jol belgileri, 669 aıaldama pavılondary jáne 198 baǵdarsham nysandary syrlandy, jol boıyndaǵy 350 qudyqtyń qaqpaǵy qalpyna keltirildi.
Budan soń «Meniń aýlam - meniń baǵym» aptalyǵy boıynsha aýlaishilik aýmaqtar retke keltirildi. 1 340 aýla men balalar oıyn alańdary, 1168 qoqys konteıneri jáne 2 963 qoqys alańy jınaldy. 189 eskertkish retke keltirildi.
- Bizdiń aımaq turǵyndary «Jasyl aımaq» aptalyǵyna da belsene qatysty. Oblystyń eldi mekenderinde 26,7 myń kóshet otyrǵyzyldy. «Tabıǵatty qorǵaý - adamnyń boryshy» aptalyǵynda ruqsat etilmegen polıgondar men lastanǵan ýchaskeler joıyldy. 32,4 myń tonna qatty turmystyq qaldyqtar shyǵaryldy, - dep atap ótti Kazinform tilshisine bergen suhbatynda óńirlik energetıka jáne turǵyn úı-kommýnaldyq sharýashylyq basqarmasy bólim basshysynyń mindetin atqarýshy Álisher Temirtas.
Ekologııalyq aılyqqa barlyǵy oblysta 107 myńnan astam turǵyn, 3,2 myń sharýashylyq júrgizýshi sýbekti, kásiporyndar, memlekettik mekemeler, uıymdar, páter ıeleriniń kooperatıvteri jumyldyrylǵan. Úı aýlalarynan 54,2 myń tonna qoqys shyǵarylǵan. Búgingi tańda qalalar men aýdandardyń merdigerlik uıymdary eldi mekenderdiń sanıtarlyq jaǵdaıyn qoldaý boıynsha jumystardy jalǵastyryp jatyr.
