Taza Qazaqstan: Pavlodarda 200 myńnan astam adamnyń qatysýymen senbilik ótip jatyr

«Taza Qazaqstan» respýblıkalyq ekologııalyq tujyrymdamasyn iske asyrý aıasynda eldi mekenderdi sanıtarlyq tazartý boıynsha keshendi is-sharalar jalǵasyn taýyp jatyr. 11 sáýirde óńir qalalarynda «Taza qala» ekologııalyq aktsııasy ótip, onyń aıasynda iri kásiporyndar men uıymdar qoǵamdyq keńistikterdi tazalaý jumystaryna belsene atsalysty. Al 18 sáýirden aımaqta «Tazalyq aılyǵy» jarııalanǵan edi. Onyń sheńberinde «Taza aýla» aktsııasy ótkizildi. Іs-shara barysynda PIK, MIB jáne jaı seriktestikterdiń ókilderi aýlalar aýmaqtaryn abattandyr, tazalaý jumystaryn uıymdastyrdy.

Búgingi senbilik óziniń aýqymdylyǵymen erekshelenip otyr. Ertis-Baıan óńiri boıynsha 200 myńnan astam adam tazalyq is-sharalaryna atsalysyp jatyr. Barlyq aýdan-qalalarda aǵash kóshetteri otyrǵyzylyp jatyr. Aǵa býyn mundaı ekologııalyq is-shara jas urpaqty qorshaǵan ortany qorǵaýǵa baýlýǵa úlken sep bolady degen pikirde.

- Búgin jalpyoblystyq senbilik retinde jarııalanǵan bolatyn. Oǵan 200 myńnan astam adam men 40 myńdaı uıym qatysty. Tazalyq jumystaryna 600-den astam arnaıy tehnıka jumyldyryldy. Nátıjesinde 20 myń tonnaǵa jýyq qoqys shyǵaryldy. Barlyq qatysýshylar qajetti qural-jabdyqtarmen qamtamasyz etildi. Tazalyq aılyǵy aıasynda oblys polıgondarynda jeke turǵyndardan turmystyq qaldyqtardy tegin qabyldaý uıymdastyryldy, - dep atap ótti oblystyq turǵyn úı-kommýnaldyq sharýashylyq basqarmasy turǵyn úı sharýashylyq bólimi basshysynyń mindetin atqarýshy Álisher Temirtas.

Óńirdi kógaldandyrýǵa erekshe nazar aýdarylyp otyr. Osy maqsatta bul kúni oblys boıynsha shamamen 30 myń kóshet otyrǵyzylyp jatyr. Sonyń ishinde Baıanaýyl aýdanynda «Jasyl el» qozǵalysynyń eriktileri Pavlodar oblysynyń ákimi Asaıyn Baıhanovtyń qatysýymen 500-den astam qaraǵaı ekti.

Pavlodar qalasy ákiminiń baspasóz hatshysy Maqpal Qarjaýbaı atap ótkendeı, shahardaǵy turǵyn úı-kommýnaldyq sharýashylyq bólimi senbilikke qatysýshylardy qajetti qural-jabdyqtarmen jáne qoqys shyǵarýǵa arnalǵan arnaıy tehnıkamen qamtamasyz etken. Aýqymdy aktsııaǵa qatysýshylarǵa palaý, baýyrsaq pen ystyq shaı usynyldy.

- «Taza Qazaqstan» aktsııasy aıasynda búgin júzdegen qala turǵyny Jetekshi aýylynyń mańyndaǵy ruqsat etilmegen qoqys úıindisin tazalaýǵa atsalysty. Pavlodarda 18 sáýir men 18 mamyr aralyǵynda tazalyq pen abattandyrý aılyǵy jarııalanǵan bolatyn. Osy is-shara sheńberinde ekologııalyq aktsııalarǵa qala turǵyndary, memlekettik organ ókilderi, bıznes qaýymdastyǵy, qala kásiporyndary men beı-jaı qaramaıtyn azamattar belsendi túrde qatysyp jatyr. Naýqan bastalǵan sátten bastap 9 myń tonnadan astam qoqys shyǵarylyp, jumysqa 200-ge jýyq tehnıka jumyldyryldy, - deıdi ol.

Aıtyp óteıik, keıingi jyldary oblys ortalyǵynyń jastary «Taza Qazaqstan» aktsııasyna ún qosyp, tazalyq sharalaryn úzbeı júrgizip keledi. Ertis, Ýsolka ózenderiniń jaǵalaýy, «Qazqonaq» tabıǵı eskertishi mańy, saıabaqtar men skverler, avtojoldar men kópir aýmaqtary, balalar alańdary qoqystan tazartylyp, jastar qorshaǵan ortanyń tazalyǵyna beıjaı qaramaıtynyn baıqatty.

- Kóp adamdar «Taza Qazaqstan» bul ádettegi senbilik ótkizý dep oılaıdy. Deıturǵanmen bul aktsııanyń máni tereńde, ol bizdiń zamandastarymyzdy ekologııalyq turǵydan tárbıelep, qorshaǵan orta jaıly bilimin jetildiredi. Óńirlik jastar bastamalaryn damytý ortalyǵy jyl saıyn ekologııalyq desant quryp, qaladaǵy kópshilik oryndardy, úı aýlalaryn, saıabaqtardy kóshelerdi tazalaýǵa shyǵady. Olar saýda úıleri men kóshelerde jurtshylyqqa býkletter de taratady. Paraqshada qoqysty qalaısha bólek jınaýdyń qarapaıym ádisteri kórsetilgen. Máselen, plastık bótelkelerdi qaıda tastaýǵa bolatyny aıtylady, - deıdi oblystyq jastar bastamalaryn damytý ortalyǵynyń dırektory Rızat Rahymjanov.

Al «Tandem-PV» JShS-nyń jumysshysy Alekseı Skvortsov elimizde ıgi dástúrlerdi jańǵyrtýǵa arnalǵan «Taza Qazaqstan» aktsııasy turaqty ótip jatqanyna qýanyshty. Osyndaı birlesken is-qımylymyzdyń nátıjesinde qoǵam ókilderi aınalamyzdy únemi muntazdaı taza etip ustaı alatyny anyq dep sanaıdy ol.

- Bul bizdiń qalamyzdyń ekologııasyn jaqsarta túsýge qosqan úlesimiz dep bilemin. Qoǵamdyq oryndardaǵy jasyl jelekti kóbeıtip ári ony ózgelerge nasıhattaı otyryp, biz jastardy tabıǵatty aıalaýǵa jáne adal eńbektenýge úıretemiz, - dedi ol.

Buǵan deıin Memleket basshysy «Taza Qazaqstan» qozǵalysyna mıllıondaǵan erikti qosylǵanyn atap ótken.