«Taza Qazaqstan»: onlaın-platformaǵa astanalyqtardan 3 600-den astam ótinim tústi

ASTANA. KAZINFORM — Elordada abattandyrý, kógaldandyrý jáne jol jóndeý máseleleri boıynsha ótinim joldaýyna arnalǵan «Taza Qazaqstan» onlaın-platformasynyń jumysy nátıjeli túrde jalǵasyp keledi. Qala turǵyndary arasynda bul qyzmetke suranys joǵary, dep habarlaıdy Astana qalasy ákimdiginiń resmı saıty.

«Taza Qazaqstan» platformasy arqyly árbir qala turǵyny abattandyrýǵa qatysty ózekti máselelerdi kótere alady.

Platforma iske qosylǵannan beri munda barlyǵy 3 669 ótinim kelip túsken. Onyń 3 305-i tolyq oryndalǵan, taǵy 3 ótinim oryndalý ústinde, qalǵany – qaralý satysynda.

Ótinimderdiń basym bóligi aýmaqtardy abattandyrý, kóshelerdi jaryqtandyrý, jol jóndeý, kógaldandyrý, sondaı-aq ruqsatsyz qoqys úıindilerin joıý máselelerine qatysty.

Barlyq eskertý men usynys ýaqtyly qaralyp, turǵyndarǵa keltiriletin qolaısyzdyqtardy barynsha azaıtýǵa múmkindik berip otyr.

«Taza Qazaqstan» qyzmetiniń basty artyqshylyǵy – turǵyndarmen jedel ári ashyq baılanystyń qamtamasyz etilýi.

Aıta keteıik, Almaty jańa jyldy «Taza Qazaqstan» aktsııasymen bastady.